दलीय घेराबन्दीमा परी उम्कीन सकेनन उदय, शहिदनगरमा जसपा,माओवादी र काँग्रेसको सँयुक्त सरकार

न्यूज ब्यूरो, जनकपुरधाम । धनुषाको शहिदनगर नगरपालिकाका निवर्तमान मेयर एवम् माओवादी केन्द्रबाट शहिदनगरको मेयरमा उम्मेदवारी दिएका उदय कुमार बरबरिया (यादव) दलिय घेराबन्दीमा परे ।

गत बैशाख ३० गते भएको स्थानीय तहको चुनावमा तीन दलको घेराबन्दीमा परी बरबरिया यसपालीको चुनावमा उम्कन सकेनन् । गत २०७४ सालको चुनावमा भारी मतान्तरले निर्वाचित भई शहिदनगरको मुहार फेरेका बरबरियालाई तीन दलको घेराबन्दीले पराजयको बन्दी बनाइदिएको हो ।

शहिदनगरमा नेपाली काँग्रेस र नेकपा माओवादी केन्द्रबीच कडा टक्कर हुने अनुमान गरिएपनि बीचमा जनता समाजवादी पार्टीले बाजी मारेको हो । एकिकृत समाजवादी, नेकपा एमाले र केही वडा काँग्रेसको त्रिपक्षिय घेराबन्दीमा परेपछि जसपाले बाजी मारेको हो ।

वडास्तरमा तालमेल भएका सम्भावित उम्मेदवारलाई मत तथा माथिल्लो अर्थात मेयरमा जसपालाई एक भोँट दिने गरी बनाइएको घेराबन्दीमा निवर्तमान मेयर यसपाली उम्कन सकेनन् । उदयलाई हराउनकै लागि तीन दलिय आन्तरिक तालमेल भएको बताइएको छ ।

शहिदनगर नगरपालिकाको गत चुनावमा तेस्रो नम्बरमा आएका जसपााका दिनेश प्रसाद यादव २०७९ को स्थानीय तह चुनावमा अधिक मत ल्याएर निर्वाचित भएका छन् । उनी ५७४३ मत प्राप्त गरी निर्वाचित भएका छन् ।

सोही क्रममा नेपाली काँग्रेसको पनि बलियो सँगठन रहेको शहिदनगरमा उम्मेदवार सुधीर गोईतले भने ४१०५ मत ल्याएका छन् भने उदय बरबरिया ४०७७ मत ल्याएका छन् ।

शहिदनगरको वडा नं. १ बाट काँग्रेसका तेजिलाल यादव, वडा नं. २ बाट सतेन्द्र चोरबार यादव, वडा नं. ४ बाट रमेश मुखिया, वडा नम्बर ७ बाट महेश्वर मण्डल र वडा नं. ९ बाट शिव कुमार खेडवार यादव निर्वाचित भएका छन् ।

यस्तै, जसपाबाट वडा नं. ३ का मनोज कुमार दास र वडा न. ६ बाट उमेश कुमार निराला निर्वाचित भएका छन् । वडा नं. ५ बाट माओवादी केन्द्रका सुरेश कापर निर्वाचित भएका छन् भने वडा नं. ८ बाट पनि माओवादी केन्द्रका तनुक लाल कुसियैत यादव निर्वाचित भएका छन् ।