भारत र नेपालबीचको सम्बन्ध हिमालजस्तै अटल छ : नरेन्द्र मोदी

न्यूज ब्यूरो ,लुम्बिनी : भारतीय प्रधानमन्त्री नरेन्द्र मोदीले नेपाल भारतबीचको सम्बन्धन हिमालजस्तै अटल भएको बताएका छन्। बुद्धजयन्तीको अवसरमा लुम्बिनीमा आयोजित समारोहमा सोमबार सम्बोधन गर्दै प्रधानमन्त्री मोदीले दुई देशको सम्बन्धलाई हिमालजतिकै उचाइ दिनुपर्ने बताए।

'भारत र नेपालबीचको सम्बन्ध हिमालजस्तै अटल छ, हिमालजस्तै पुरानो छ। त्यो नैसर्गिक र अस्वभाविक सम्बन्धलाई हिमालजतिकै उचाइ दिन जरुरी छ,' उनले भने।

उनले नेपाल र भारतबीच भएको खानपान, रीतिरिवाज र पारिवारिक सम्बन्धनजस्तै इन्फास्टक्चर र प्रविधिमा पनि सहयोग गर्न भारत हरदम तयार रहेको बताए। उनले नेपालीमै सम्बोधन गर्दै भने, 'नेपाल र भारतबीचको मित्रताले मानवीय संकल्पलाई पूरा गर्न दुवै देशले यसैगरी काम गरिरहन्छ भन्ने मैले विश्वास लिएको छु।'

उनले नेपाल आउँदा राजनीतिक भ्रमणभन्दा छुट्टै अध्यात्मिक अनुभूति हुने बताए। उनले यसको मूल कारण यहाँका प्राचीन सभ्यता, तीर्थस्थल, मठ-मन्दिर र सर्वोच्च शिखर सगरमाथा भएको बताए। उनले विगत सम्झिए, 'म जनकपुर आउँदा भनेको थिएँ- नेपाल बिना राम पनि अधुरो छ। नेपाल र भारतबीच प्राचीनकालदेखि अद्भूत सम्बन्ध रहँदै आएको छ। त्यसलाई दुवै देश मिलेर समृद्धितर्फ अगाडि बढँउनुपर्छ। नेपाल र भारतको विरासतलाई मिलेर समृद्ध बनाउँ। बुद्ध सर्किट र लुम्बिनीलाई सहयोग गर्न भारत सधैं तयार छ।'