निष्पक्ष निर्वाचन नगर्ने अधिकृतलाई जनकारवाहीको लागि तयार रहौँः डा. सिके राउत

न्यूज ब्यूरो, जनकपुरधाम । जनमत पार्टीका अध्यक्ष डा. सिके राउतले निर्वाचनको बेला गडबड गर्ने निर्वाचन अधिकृतलाई जनकारवाहीको लागि तयार रहन निर्देशन दिएका छन् ।

अध्यक्ष राउतले जनमत पार्टीका आफ्ना युवा दस्तलाई हरेक बुथसम्म पुगेर बुथमा नजर राख्न निर्देशन दिएका छन् । निष्पक्ष निर्वाचन गर्न नसके निर्वाचन अधिकृतलाई कारवाही गर्न तैयार बस्न निर्देशन दिएका छन् ।

प्रहरी, प्रशासन र निर्वाचन अधिकृतहरू सत्ताधारी पार्टीसँग पूर्णतः बिकिसकेको आरोप लगाउँदै डा. राउतले यसप्रति कडा नजर राख्न साँकेतिक भाषामा भनेका छन् ।

“सत्ताधारी पार्टीहरूले निर्वाचनमा हाम्रो उम्मेदबारलाई धम्काउने, हाम्रो पक्षका जनतालाई अवरोध गर्ने, बाटो रोक्ने, आफू कमजोर भएको ठाउँमा बूथ लूट्ने, बोगस मत हाल्ने, हाम्रो पार्टीको सदर मतलाई समेत बदर गर्ने आदि किसिमका गतिविधि प्रहरी, प्रशासन र निर्वाचन अधिकृतहरूले गर्नसक्छन् भन्ने धेरै जिल्लामा स्पष्ट देखिएको छ।”– उनले नीजी सचिवालयको फेसबुक पेजमा लेखेका छन् ।

यस्तो कुनै गतिविधि भएको खण्डमा आन्दोलनका लागि तैयार भएर बस्न युवा दस्तालाई निर्देशन दिएका छन् ।

विभिन्न समयमा चुनावको बेला भिज्लान्ते प्रयोग गरी उम्मेदवारहरुले मतदातालाई धम्काउने, डर, त्रास दिने, बुथ क्याप्चर गर्ने, मतपत्र छापेर हाल्ने जस्ता गतिविधिलाई मध्यनजर गर्दै उनले यस्तो निर्देशन दिएका हुन् ।