उम्मेदवारमाथि ज्यान मार्ने प्रयासको घटनालाई गम्भिरता पूर्वक अनुसन्धान हुँदैछः एसपी रजौरे

न्यूज ब्यूरो, जनकपुरधाम । गत बुधबार राती धनुषाको कमला नगरपालिकाको वडा नम्बर १ मँगराहास्थित उम्मेदवार र उनको परिवारमाथि भएको आक्रमणको घटनालाई गम्भिरता पूर्वक लिएको धनुषाका प्रहरी प्रमुख बसन्त रजौरेले बताएका छन् ।

घटनाको जानकारी सम्बन्धी फ्लोअपमा न्यूज ब्यूरोसँग कुराकानी गर्दै एसपी रजौरले गम्भिर घाईते भएका उम्मेदवारका बुवा चन्द्र नारायण यादवको बयानको आधारमा अनुसन्धान हुने बताएका छन् ।

राजनीतिक माहौलमा घटनालाई अतिरञ्जित बनाउन सकिने बताउँदै एसपी रजौरेले उम्मेदवार र उनको बुवालाई ज्यान मार्ने प्रयासको यो घटना प्रहरीको लागि चुनौती दिएको बताए ।

गत बुधबार राती करिब १२ः३० बजेको समयमा अज्ञात समूहले नेपाल कम्यूनिष्ट पार्टी (माओवादी केन्द्र) बाट वडाध्यक्षमा उम्मेदवारी दिएका सर्वदेव यादवमाथि आक्रमणको प्रयास गरिएको थियो ।

सो क्रममा घरको अर्को कोठामा सुतिरहेका सर्वदेवसम्म पुग्न नसकेर समूहले बाहिरै सन्दुकमा सुतेका उनको बुवा चन्द्र नारायण यादवमाथि नै रड र धारिलो हतियार प्रहार गरि गम्भिर घाईते बनाएको हो ।

एसपी रजौरेले सो घटनाको सुक्ष्म अनुसन्धान भईरहेको बताउँदै ईलाका प्रहरी कार्यालय खजुरीको टोली र जिल्ला प्रहरी कार्यालय धनुषाको सँयुक्त टोलीले अनुसन्धान तीव्र पारेको बताए ।

यद्यपी, उनले अनुसन्धानको क्रममा खुलेको तथ्यहरु भने अहिले सार्वजनिक गर्न चाहेनन् ।

घटनामा गम्भिर घाईते बनेका वडा नं. १ का वडाध्यक्षको उम्मेदवार सर्वदेव यादवका बुवा चन्द्रनारायण यादव र नेकपा एमालेबाट वडा सदस्यमा उम्मेदवारी दिएका हरेराम मण्डलले केही जनाको नाम बताएका छन् ।

सो क्रममा गम्भिर घाईते भई विराटनगरस्थित नोबेल हस्पिटलमा उपचाररत चन्द्रनारायणले वडा नं. १ का जसपाबाट उम्मेदवार रहेका राजकुमार यादवको नाम लिएका छन् भने राजकुमार यादवले आरोप निराधारसहित फँसाउन राजनीति गरेको बताउँदै आएका छन् ।

एमालेका उम्मेदवार तथा घाईते हरेराम मण्डलले भने कमला नगरपालिका वडा नम्बर २ माचि झिटकैया बस्ने केही जनातर्फ ईसारा गरेका छन् । उनले अहिले नाम नखुलाएपनि माचि झिटकैयाकै रहेको भनेर चिनेको प्रतिक्रिया दिएका छन् ।

यता, ईलाका प्रहरी कार्यालय खजुरीका प्रहरी नीरिक्षक (ईन्सपेक्टर) निरञ्जन घिमिरेले केही जना गाउँबाट फरार समेत भएको र उनीहरुमाथि कडा निगरानी राखेको बताए । उनले चुनावअघि नै घटनामा सँलग्न पक्राउ गरिने बताए ।