४ बर्षदेखि ठेकेदारी, अहिले गाउँपालिका अध्यक्षमा उम्मेदवारी

न्यूज ब्यूरो, जनकपुरधाम । पूर्वी धनुषाको जनकनन्दिनी गाउँपालिकाको अध्यक्ष पदमा जनता समाजवादी पार्टी (जसपा) नेपालबाट दिपिन देव यादवले उम्मेदवारी दर्ता गराएका छन् ।

स्थानीय तहको सँरचनापछि विभिन्न स्थानीय तह चहारेर ठेकेदारी गर्दै आएका यादव सोमबार जनकनन्दिनी गाउँपालिकाको अध्यक्ष पदको लागि मनोयन दर्ता गराएका हुन् ।

जनकनन्दिनी गाउँपालिका, कमला नगरपालिकामा विगत ४ बर्षदेखि नै भौतिक निर्माण कार्यको लागि ठेकेदारी गर्दै आएका दिपिन देव यादवले अध्यक्ष पदको लागि उम्मेदवारी दर्ता गराएका हुन् ।

जनकनन्दिनी गाउँपालिका वडा नम्बर १ इनरवा स्थायी निवासी यादवले जसपाको अति कमजोर सँगठन रहेको जनकनन्दिनी गाउँपालिकाबाट उम्मेदवारी दर्ता गराएका हुन् ।

जनकनन्दिनी गाउँपालिका र कमला नगरपालिकाको विभिन्न ठाउँमा गरेको भौतिक पूर्वाधार निर्माणको कार्यमा कमसल कार्य गरी भुक्तानी लिएको आरोप उनीमाथि छ ।

यता, जनकनन्दिनी गाउँपालिकामा बलियो सँगठन रहेको नेपाली काँग्रेसबाट सुदेश चौधरी अध्यक्ष पदमा उम्मेदवारी दर्ता गराएका छन् भने उपाध्यक्षमा कमला सहगलले उम्मेदवारी दर्ता गराएकी हुन् ।

यता, गाउँपालिका अध्यक्षका उम्मेदवार दिपिन देव यादवले आफू कुनै पनि ठाउँमा कुनै ठेकेदारी नगरेको दाबी गरेका छन् । उनले विभिन्न समयमा जनताको समस्या लिएर मात्र स्थानीय तहहरुमा गएको बताए ।

उनले आफूमाथि लगाइएको आरोप निराधार रहेको बताउँदै यस्तो कुनै प्रमाण पेश गरिए उम्मेदवारी फिर्ता लिने चुनौति पनि दिए ।