मेयरको टिकट पाउने लोभमा एमाले पसेका जनकपुरका जानकीराम छठिहार नहुँदै भागे

न्यूज ब्यूरो, जनकपुरधाम । मधेश प्रदेशको राजधानी जनकपुरधाम उपमहानरपालिकाको मेयरको टिकटको लागि लोसपालाई लात मारेका जानकीराम एमालेबाट पनि भागेका छन् ।

मेयरको टिकट पाउने लोभमा ६ दिन अघि लोसपा त्यागेर एमाले पसेका जनकपुरधाम उपमहानगरपालिका वडा नम्बर ७ का निवर्तमान वडाध्यक्ष जानकी राम साहले एमालेबाट पनि भागेका छन् ।

जनकपुरधाम उपमहानगरपालिकाको मेयरको लागि टिकट पाउने आश्वासन पाएका साहले टिकट नपाएपछि एमालेमा छठिहार (न्वारण) नगर्दै स्वतन्त्र भएका छन् ।

एमालेले जनकपुरको मेयरमा शिवशंकर साह हिरालाई उम्मेदवार बनाएपछि साहले सोमबार पार्टी परित्याग गरेको घोषणा गरेका हुन्।

उनले सोमबार दिउँसो १ बजे स्वतन्त्र उम्मेदवारी दिने तयारी गरेका छन। यद्यपी नवगठित तराई मधेस लोकतान्त्रिक पार्टीबाट समेत उनलाई मेयरको टिकटको अफर गरिएको छ।

६ दिन अघि नै एमालेका अध्यक्ष एवम् पूर्व प्रधानमन्त्री केपी शर्मा ओलीले उनलाई एमाले प्रवेश गराएका थिए।

ओलीले साहलाई जनकपुरधाम उपमहानगरपालिकामा पार्टीबाट मेयरको उम्मेदवार बनाउने प्रतिवद्धता जनाएका थिए।

ओलीबाट आश्वासन पाएका साहले केही समयअघि नै उपमहानगरका पाँच ठाउँमा सम्पर्क कार्यालय नै खोलेका थिए।