जनकपुरः मेयरमा टिकट नदिएपछि यादव समूहको कुटाकुट, रोहितासहित १० जना कुटिए

न्यूज ब्यूरो, जनकपुरधाम । जनता समाजवादी पार्टी (जसपा) नेपालको स्थानीय तह निर्वाचनको लागि टिकट वितरणको क्रममा विवाद हुँदा कुटाकुट समेत भएको छ ।

जनकपुरधामस्थित रहेको जसपाको कार्यालयस्थित टिकट वितरणको क्रममा विवाद भएको हो । सो क्रममा धनुषाको गणेशमान चारनाथ नगरपालिकाको लागि निवर्तमान मेयर रामबाबु यादवलाई पुनः टिकट दिनुपर्ने भन्दै उनको समूहले निर्णयकर्ताहरुमाथि नै कुटपिट गरेको हो ।

रामबाबु यादवलाई नै पुनः टिकट नदिएपछि असन्तुष्ट बनेका यादव समूहले सोही असन्तुष्टि व्यवहारमा प्रदर्शन गरेपछि कार्यालयभित्रै कुटाकुट हुँदा पार्टीका केन्द्रीय सदस्य गजाधर रोहितासहित अन्य केही जनालाई कुटपिट गरिएको हो ।

आईतबार पार्टी कार्यालय धनुषामा गणेशमान चारनाथ नगरपालिका, हँसपुर नगरपालिका र शहिदनगर नगरापलिकामा मेयरको उम्मेदवारलाई टिकट वितरण गर्न बसिरहेको बैठकबीचमै रामबाबु यादवका समर्थकहरुले हो हल्ला गरेपछि कुटाकुट भएको छ ।

गणेशमान चारनाथ नगरपालिकाको लागि पार्टीका मधेस प्रदेश अध्यक्ष शेषनारायण यादव र गजाधार रोहिताले अर्का उम्मेदवार छनोट गरेपछि निवर्तमान मेयर रामबाबु यादव असन्तुष्ट बनेको थियो ।

रामबाबुले आफूले पुनः टिकट पाउनुपर्ने अडान राखेपछि बैठक हलमा असन्तुष्टिका स्वरहरू सुनिन थालेपछि अर्को उम्मेदवार चयन गर्ने निर्णय भएपछि रामबाबुका समर्थकहरूले रोहितालगायत अन्य नेता कार्यकर्तामाथि हातपात गरेका छन् ।

कुटपिटबाट रोहितालाई गम्भीर चोटपटक लागेको छ भने अन्य व्यक्तिहरू सामान्य घाइते भएका छन् ।

यता, भौतिक पूर्वाधार तथा यातायतमन्त्रीसमेत रहेकी पार्टीकी नेतृ रेणुकुमारी यादव, शेषनारायण यादव र गजाधर रोहितालगायतका नेताहरूले आफू अनुकूल मनपरी रूपले टिकट वितरण गरेपछि बाध्य भएर विरोध गरेको रामबाबु यादवको भनाइ छ ।