शितल पर्व जुडशितल मनाइदै, मधेशमा सार्वजनिक विदा

न्यूज ब्यूरो, जनकपुरधाम । शितलताको आस्था भनेर मनाइने जुडशितल पर्व आज हर्षोल्लासका साथ मनाईदै छ । प्रत्येक बर्ष बैशाख २ गते मनाइने जुडशितल पर्वको रौनक मधेशमा देखिएको छ ।

प्रत्येक बर्षको बैशाख २ गते आफूभन्दा ठुलावडाबाट शीरमा शितल पानी थप्ने परम्परा रहिआएको छ । एकाविहानैदेखि ठुलावडाले आफूभन्दा कान्छोलाई टाउकोमा पानी थाप्दै गर्मीमा शितलताको कामना आर्शिवाद दिने गरिन्छ ।

बुबाआमा, गुरु, मान्यजन एवम् जेष्ठ सदस्यले आफूभन्दा सानाको शिरमा जल रालेर आर्शीवाद दिँदै पर्व मनाउन आज पनि सुरु भइसकेको छ।

यस पर्वमा वर्षभरि शीतलता, सुख, समृद्धि, शान्ति, दीर्घायु एवम् उत्तरोत्तर प्रगति होस् भन्ने ठूलाबडा एवम् जेष्ठ सदस्यले आफूभन्दा सानालाई आशीर्वाद दिने गरिन्छ।

आजका दिन रुखविरुवामा पानी हाल्नुको साथै खेतबारीमा मलजल गर्ने परम्परा छ।

सूर्यको तापबाट आकुलव्याकुल मानव लगायत रुखविरुवालाई शीतलता प्रदान गर्नु यस पर्वको मूल उद्देश्य हो।

नयाँ वर्षमा जल सिँचित गर्दा बालबालिकाको मस्तिष्क शीतल हुने र वर्षभरि नै उसले राम्रो काम गर्ने जनविश्वास छ।

आजैका दिन केही स्थानमा हिलोपानी पनि खेल्ने गरिएको छ। विशेष परिकार बनाएर खाने चलन पनि यस पर्वमा छ।

जुडशीतलको अवसरमा मधेस प्रदेश भर आज सार्वजनिक बिदा दिइएको छ।