जनकपुरमा मालपोतका हाकिम ५ लाख रुपैयाँ घुससहित रँगेहात पक्राउ

न्यूज ब्यूरो, जनकपुरधाम । भूमिसुधार तथा मालपोत कार्यालयका हाकिम जनकपुरमा घुससहित रँगेहात पक्राउ परेका छन् ।

मालपोत कार्यालय धनुषाका निमित्त प्रमुख प्रशासकीय अधिकृत सुनिल कुमार झालाई अख्तियार दुरुपयोग अनुसन्धान आयोग बर्दिवासको टोलीले ५ लाख रुपैयाँ घुससहित रँगेहात पक्राउ गरेको हो ।

जनकपुरधाम उपमहानगरपालिका वडा नम्बर २ भानुचोकस्थित रहेको चिया पसलबाट उनलाई अख्तियारले रँगेहात पक्राउ गरेको हो ।

एक सेवाग्राहीबाट जमिन पास गराउने सम्बन्धमा घुस मागेको गोप्य सूचनाको आधारमा बर्दिवासबाट खटिआएको अख्तियारको टोलीले उनलाई रँगेहात पक्राउ गरेको हो ।

भानुचोकस्थित चिया पसलमा सेवाग्राहीलाई ५ लाख रुपैयाँ सहित आउन भनेका थिए । कालो प्लास्टिकमा बेरिएर राखिएको ५ लाख रुपैयाँ सहित उनलाई बिहान करिब ८ः३० बजे पक्राउ गरेको हो ।

अख्तियार दुरुपयोग अनुसन्धान आयोग बर्दिवासको अनुसार झालाई प्रक्रिया पुरा गरी बर्दिवास ल्याउने तयारी गरिएको हो ।