शिवशँकर साह 'हिरा' एमालेबाट जनकपुरधामको मेयर चुनावको लागि पक्का

न्यूज ब्यूरो, जनकपुरधाम । मधेश प्रदेशको राजधानी जनकपुरधामको मेयरको लागि एमाले पार्टीबाट शिवशँकर साह “हिरा” लाई उम्मेदवारको रुपमा पक्का भएको छ ।

जनकपुरधाम उपमहानगरपालिकाको मेयरको लागि एमाले पार्टीबाट शिवशँकर साहको चर्चा पहिलेदेखि नै चल्दै आएको थियो । साह एमालेका नेता एवम् पूर्वमन्त्री रघुवीर महासेठको निकट छन् ।

जनकपुरधामका सबै २५ वटा वडा कमिटीको तर्फबाट साहलाई मेयरका लागि सर्वसम्मत सिफारिस गर्ने निर्णय गरिएको हो।

एमाले जनकपुरधाम नगर कमिटीका सचिव राजु साहका अनुसार मधेश प्रदेश कमिटी सदस्य साहलाई सर्वम्मतत उम्मेदवार निर्णय गरिएको हो।

साह यसअघि जनकपुरधाम उद्योग वाणिज्य संघ र नेपाल उद्योग वाणिज्य महासंघ प्रदेशका अध्यक्ष पनि बनेका थिए।

जनकपुरधामको मेयरको लागि एमालेबाट शिवशँकर साह पक्कापक्की भएपछि पुनः मेयरको लागि चुनाव लडने जसपाका लालकिशोर साहलाई कडा टक्कर दिने अनुमान गरिएको छ । हिराको उम्मेदवारीले लालकिशोर साहलाई झटका लागेको अनुमान गरिएको छ ।

२०७४ को स्थानीय तह निर्वाचनमा जनकपुरधामको मेयरमा एमालेबाट उठेका लक्ष्मीनारायण पाठक पार्टी विभाजनपछि माधव नेपाल नेतृत्वको एकीकृत समाजवादीतिर सक्रिय छन्।