धरहारा बनाएका रमण कन्सट्रक्सनका मालिक महतो जनकपुरधामको मेयरमा लडने घोषणा

न्यूज ब्यूरो, जनकपुरधाम । नेपालका धरोहरको रुपमा रहेको काठमान्डौँस्थित धरहारा निर्माण गराएका रमन कन्सट्रक्सनका सँचालक बलराम महतोले जनकपुरधामको मेयरमा उम्मेदवारी दिने घोषणा गरेका छन् ।

शनिबार जनकपुरधामस्थित पत्रकार सम्मेलनको आयोजना गरी महतोले ठेकेदारबाट सन्यास लिँदै आउँदो बर्षको बैशाख ३० गते तोकिएको स्थानीय तहको चुनावमा मेयर पदमा उम्मेदवारी दिने घोषणा गरेका छन् ।

३० वर्ष निर्माण व्यवसायीको रुपमा काम गरेका महतोले पेशाबाट सन्यास लिँदै जनकपुरधामको विकासका लागि उम्मेदवारी घोषणा गरेको बताएका छन ।

आफूलाई अब केवल समाजसेवा र जनकपुरधामको विकासका लागि केन्द्रित हुने भएकाले उम्मेदवारी घोषणा गरेको उनको भनाइ छ । जनकपुरधामको लागि उनले कुनै पार्टीबाट नभई स्वतन्त्र उम्मेदवारीको घोषणा गरेका हुन् ।

राजनीति रहित भएर आफू जनकपुरधामको विकास गर्छ चाहेको औल्याउँदै जनकपुरधामलाई स्मार्ट सिटीको निर्माण तथा धार्मिक पर्यटकीय नगरीको रुपमा विकास गर्न लक्ष्य लिएर मेयर पदमा उम्मेदवारी दिन घोषणा गरेको बताए ।

“राजनीति दलको तर्फबाट पनि आफूलाई अवसर प्राप्त नभएको होइन, तर राजनीति दलबाट उम्मेदवार भएमा विजयी भएपनि राजनीति दलको अनुसार कार्य गर्नुपर्छ । त्यसैले आफू स्वतन्त्र, निष्पक्ष र जनकपुरवासीको भावना अनुसार कार्य गर्न चाहेका छौं ।” – उनले भने ।

जनकपुरधाम उपमहानगरपालिकाको २५ वटै वडाको विकास एक सामान रुपमा गर्न चाहेको बताएका छन् ।

मेयर पदका प्रत्यासी उम्मेदवार महतोले सामाजिक क्षेत्रको गरेको कार्यलाई गनाउँदै भने–“जनकपुरधामलाई स्वच्छ, सफा, हराभरा, भौतिक पूर्वाधारले सम्पन्न स्मार्ट जनकपुरको निर्माण गर्न । साँस्कृतिक तथा पर्यटकीय पूर्वाधारको निर्माण गरेर नेपालको उत्कृष्ट धार्मिक पर्यटकीय गन्तव्य बनाउने, स्थानीय तहमा उत्पादन हुने कृषिजन्य वस्तुहरुको क्रिी वितरण तथा मुलुकभर ढुवानी गर्न सकिने गरी सुविधा सम्पन्न होलसेल कृषि बजारको निर्माण गर्ने, दक्ष जनशक्ति निर्माणको लागि प्राविधिक शिक्षा तालिमको निर्माण लगायतको योजनाहरु रहेको छ ।’

कृषि, पर्यटन तथा रोजगारीको क्षेत्रमा जनकपुरधामको विकास गर्ने आफ्नो लक्ष्य रहेको महतोले दोहोर्याए ।

निर्वाचन आयोगको स्थानीय तह निर्वाचन आचारसंहितामा कुनै पनि ठेकेदार, निर्माण व्यावसायीले चुनाव लडन नपाउने भनिएको छ ।

उम्मेदवारी घोषणा कार्यक्रममा केही ठेक्केदार तथा सुडी समाजका अगुवाहरुको समेत उपस्थिति रहेको थियो भने पत्रकारहरुको पनि मोटो उपस्थिति रहेको थियो ।