ऐतिहासिक दिनः नेपाल रेल्वे आजदेखि सँचालनमा, देउवा र मोदीले गरे उदघाटन

न्यूज ब्यूरो, जनकपुरधाम । नेपालको लागि बहुप्रतिक्षित जयनगर–जनकपुरधाम–कुर्था रेलको आज (शनिबार) विधिवत उदघाटन गरिएको छ ।

प्रधानमन्त्री शेरबहादुर देउवा र भारतीय प्रधानमन्त्री नरेन्द्र मोदीले सँयुक्त रुपमा हरियो झण्डा हल्लाउँदै रेलको उदघाटन गरेका हुन् ।

विगत ८ बर्षभन्दा बढीदेखि चल्न नसकेको नेपाल रेल्वे शनिबारदेखि नियमित सँचालनमा आएको छ । त्यसको लागि प्रधानमन्त्री देउवा आज भारतको राजधानी दिल्ली पुगेर उदघाटन गरेका हुन् ।

शुक्रबार नै भारत भ्रमणमा पुगेका प्रधामन्त्री देउवाले शनिबार दिउँसो १२ बजेर ५७ मिनेटमा हरियो झण्डा हल्लाउँदै उदघाटन गरेका हुन् । प्रधानमन्त्री देउवासँगै भारतीय प्रधानमन्त्री मोदीले समेत हरि झण्डी देखाएका छन् ।

नेपालको सन्दर्भमा आज पुनः एक एतिहासिक दिनको रुपमा स्मरण गरिने छ । ब्रोडगेज रेल सँचालनको लागि प्रधानमन्त्री देउवाले रेलको उदघाटन गरी नियमित बनाएका छन् ।

आजदेखि रेल चलेपछि जनकपुरधामवासी र भारतको जयनगरवासीमा खुसियाली छाएको छ । दुवै देशबीच अब यात्रु ओहोरदोहोर सहित व्यापार समेत बढने विश्वास लिईएको छ ।

कैयौँ पटक रेल चल्ने समय तालिका भएपनि फेल हुँदै आएको थियो । यसपाली विधिवत रुपमा भर्चुअल उदघाटन गरी रेल सँचालनमा आएको हो ।