जनकपुरमा बसले ठक्कर दिएपछि युवकको घटनास्थलमै मृत्यू

न्यूज ब्यूरो, जनकपुरधाम । मधेश प्रदेशको राजधानी जनकपुरधामस्थित बसले मोटरसाईकललाई ठक्कर दिँदा एक युवकको घटनास्थलमै मृत्यू भएको छ ।

विहिबार बिहान जनकपुरधाम उपमहानगरपालिका वडा नम्बर १४ मुजेलियाको खाद्य सँस्थान नजिकै स्कूल बसले ठक्कर दिएपछि मोटरसाईकल चालकको घटनास्थलमै मृत्यू भएको प्रहरीले जनाएको छ ।

पुष्पबाटिका स्कुलको बसले अगाडीबाटै ठक्कर दिँदा मोटरसाईक चालक क्षीरेश्वरनाथ नगरपालिका महेन्द्रनगरका ३५ वर्षीय मनोज लामिछानेको मृत्यु भएको प्रहरीले जनाएका छन् ।

जनकपुरधामबाट लक्ष्मीनियाँ तर्फ जाँदै गरेको प्र–२–०३–००१ ख ०५३२ नम्बरको बसले बा ८० च ९०९४ नम्बरको मोटरसाइकललाई ठक्कर दिँदा गम्भिर घाइते भएका लामिछानेलाई उपचारको लागि प्रादेशिक अस्पताल जनकपुरधाममा ल्याउँदा चिकित्सकले मृत घोषणा गरेको प्रहरीले जनाएका छन् ।

ठक्कर दिने बसका चालक फरार भएकाले खोजी भइरहेको तथा यस घटना सम्बन्धमा थप अनुसन्धान भइरहेको प्रहरीले जनाएका छन् ।

केही दिनअघि मात्र धनुषाको सबैलास्थित मोटरसाईक दुर्घटनामा परी चार जना बालकको घटनास्थलमै मृत्यू भएको थियो भने एक जना गम्भिर घाईते भएको हो ।