धनुषाको कमला नगरपालिकामा करेन्ट लागेर एक युवकको मृत्यू, सिँगो टोल नै शोकमा

न्यूज ब्यूरो, जनकपुरधाम । पूर्वी धनुषाको कमला नगरपालिकामा एक युवकको करेन्ट लागेर मृत्यू भएको छ ।

कमला नगरपालिका वडा नम्बर ३ पर्सा टोलस्थित आफ्नै घरमा तार जोडिरहेको अवस्थामा करेन्ट लागेर एक युवकको मृत्यू भएको प्रहरीले जनाएको छ ।

घरमा बिजुलीको मिटरमा समस्या आएपछि पर्सा बस्ने बैद्यनाथ यादवको अन्दजी बर्ष ४२ को छोरा गँगाप्रसाद यादवले मिटर आफैँ ठिक गर्न गएको बेला तारमा करेन्ट लागेर गम्भिर घाईते भएका थिए ।

करेन्ट लागेपछि गम्भिर घाईते भएका यादवलाई तत्कालै एम्बुलेन्स मार्फत जनकपुरको प्रादेशिक अस्पताल लैजाँदै गर्दा बाटोमै मृत्यू भएको ईलाका प्रहरी कार्यालय खजुरीले जनाएको छ ।

खजुरीका प्रहरी नीरिक्षक रविनराज मैनालीका अनुसार, अपरान्ह आफ्नै घरमा तार जोडने क्रममा उनलाई करेन्ट लागेर गम्भिर घाईते बनेका थिए ।

स्थानीय युगलकिशोर यादवका अनुसार, करिब ८ महिना अगाडी मात्र वैदेशिक रोजगारीबाट घर फर्केका यादव बिजुली सम्बन्धी कार्यहरु पहिलेदेखि नै गर्दै आएका थिए ।

उनको दुई छोराछोरी रहेका छन् । उनीहरु अहिले जनकपुरमा अध्ययनरत रहेका छन् । एक १९ बर्षकी छोरी छिन भने १६ बर्षका छोरा हुन् ।

अकालमै यादवको मृत्यू भएपछि सिँगो टोल नै शोकमा डुबेको छ । उनको शव पोष्टमार्टमको लागि जनकपुरको प्रादेशिक अस्पतालमा राखिएको प्रहरीले जनाएको छ ।