मधेश प्रदेशः पूलबाट यात्रुबाहक बस खस्यो, ४ जनाको घटनास्थलमै मृत्यू, तीन दर्जन बढी घाईते !

न्यूज ब्यूरो, जनकपुरधाम । मधेश प्रदेशको सर्लाही जिल्लास्थित एक यात्रुबाहक बस पूलबाट तल झर्दा ४ जनाको मृत्यू भएको छ भने तीन दर्जनबढी घाईते भएका छन् ।

बस दुर्घटना हुँदा चार जनाको मृत्यु भएको छ भने तीन दर्जनभन्दा बढी यात्रु घाइते भएको जिल्ला प्रहरी कार्यालय सर्लाहीले जनाएको छ ।

बीरगञ्जबाट जनकपुरधामतर्फ आउँदै गरेको ना. ४ ख ८५५५ नम्बरको बस पूर्वपश्चिम राजमार्गअन्तर्गत लालबन्दी नगरपालिकास्थित फुलजोर पुलबाट तल खसेर दुर्घटना भएको सर्लाही प्रहरीका प्रवक्ता एवं डीएसपी माधवप्रसाद बुढाथोकीले जानकारी दिए ।

उनका अनुसार दुर्घटनामा चार जनाको मृत्यु भएको छ । मृतकको नाम खुल्न सकेको छैन् । अन्य तीन दर्जन यात्रु घाइते भएका छन् । उनीहरुको विभिन्न अस्पतालमा उपचार भइरहेको प्रहरीले जनाएको छ ।

मृतकको शव पोष्टमार्टमका लागि जिल्ला अस्पताल मलगंवा पुर्‍याइएको छ । बस दुर्घटनाबारे थप अनुसन्धान भइरहेको प्रहरीले जनाएको छ ।

मृतकहरुको सनाखत भइसकेको छैन भने उनीहरुको सनाखतको लागि जिल्ला प्रहरी कार्यालय सर्लाहीले मृतक परिवारजनहरुलाई सम्पर्कको प्रयास थालेको जनाईएको छ ।