धनुषाको तिनकोरियाचोक तनावग्रस्त, आश्रुग्यास प्रहार, एक प्रहरी घाईते !

न्यूज ब्यूरो, जनकपुरधाम । गएराती एक पसलमा आगो लगाइदिएपछि धनुषा जिल्लाको तिनकोरिया चोक अहिले तनावग्रस्त बनेको छ ।

विदेह नगरपालिकाको तिनकोरिया चोकस्थित रहेको एक पान पसलमा गएराती करिब ११ः३० बजेको समयमा अज्ञात व्यक्तिले आगो लगाएको भन्दै अहिले चोकको अवस्था तनावग्रस्त बनेको छ ।

आगो लगाउँदा पनि करिब ५० मिटरकै दुरीमा रहेको प्रहरीचौकी तिनकोरियाले खवर नपाएको तथा प्रहरीले नै डयुटी नदिँदा कसैले आगो लगाएको भन्दै स्थानीय व्यापारीहरुले प्रहरी चौकी तिनकोरिया घेराउ गरी तनावग्रस्त बनाएको छ ।

जनकपुर–कमला हुलाकी सडक अन्तर्गत पर्ने तिनकोरियाचोकस्थित सडक जाम गरेर प्रदर्शन गरेपछि खुलाउन आएका प्रहरी र स्थानीयवासीबीच झडप भएको हो ।

झडपको क्रममा एक जना प्रहरी घाईते भएको बताइएको छ । प्रहरीले भीडलाई तितरबितर पार्नको लागि एक राउण्ड अश्रुग्यास समेत प्रहार गरेको जानकारी प्राप्त भएको छ ।

जनकपुर–कमला हुलाकी सडकखण्ड नै जाम गरिदिएपछि सयौँ सवारी साधनहरु जकथक परेको छ भने कैयौँ सवारी साधनहरु वैकल्पिक बाटो प्रयोग गरी आवतजावत गरिरहेको छ ।

जिल्ला प्रहरी कार्यालय धनुषाबाट आएको प्रहरी टोलीले सडक जाम खुलाउने प्रयास गरेको थियो । स्थानीय व्यापारीहरुले सुक्ष्म अनुसन्धानको माग गर्दै सडकजाम गरेको हो ।

अहिले प्रहरी चौकी तिनकोरियालाई घेराउ गरी स्थानीय व्यापारीहरुले प्रदर्शन गरिरहेका छन् । समस्या सुल्झाउनको लागि जनकपुरधाम उद्योग वाणिज्य सँघका पदाधिकारीहरु समेत आएका हुन् ।

शनिबार राती करिब ११ः३० बजेको समयमा तिनकोरियास्थित रहेको सन्ता पान पसलमा आगजनी गरिदिएको थियो । त्यसमा कपडा पसल समेत सँचालनमा रहेको थियो ।