खेत जान समस्या भएको गुनासोपछि काजी पैनीमा पुल बनाउँदै मेयर दास

न्यूज ब्यूरो,जनकपुरधाम । धनुषाको विदेह नगरपालिकाका मेयर बेचन दासले त्यहाँस्थित रहेको काजी पैनीमा पुल निर्माण गर्न शिलान्यास गरेका छन् ।

शनिबार बिहान विदेह नगरपालिक वडा नम्बर ६ एकराहीस्थित रहेको काजी पैनीमा पूल निर्माणको लागि शिलान्यास गरेका हुन् ।

नगरपालिकाले पाउने सशर्त अनुदानबाट २५ लाख रुपैयाँको लागतमा काजी पैनीमा पूल निर्माणको लागि मेयर दासले भूमि पूजन गरी शिलान्यास गरेका हुन् । मेयर दाससँगै प्रदेश साँसद शैलैन्द्र यादवले समेत सँयुक्त रुपमा सिलान्यास गरेका हुन् ।

प्रदेश सरकारबाट पाएको ५० लाख रुपैयाँको सशर्त अनुदानबाट नगरपालिकाको दुई ठाउँमा पूल निर्माणको योजना रहेकोमा शनिबार काजी पैनीमा भूमिपूजन गरिएको हो ।

एकराहीवासीको खेतबारी काजी पैनी पारी रहेको हुँदा बर्षायाममा खेतीपाती गर्नको लागि अधिक कठिनाई हुँदै आएको जनगुनासोपछि उनले पूलको लागि सो रकम विनियोजन गरेको बताए ।

यसअघि वैकल्पिक माध्यमबाट खेतीबारीको लागि नागरिकलाई सहज बनाउँदै आएकोमा प्रदेश सरकारले ढिलो गरी सशर्त अनुदान दिँदा अनुदान लगतै पूलको शिलान्यास गरेको मेयर दासले बताए ।

उनले नगरपालिकाभरि वस्तीस्तरसम्म सडक सँजाल पक्की बनाएको दाबी गर्दै पक्की पूलको लागि वडावासीको माग अनुसार पूलको सिलान्यास गरेको बताए ।

२५ लाख तत्काल छुटयाएको बजेटबाट शिघ्र काम सुरु भई असार मसान्तसम्म निर्माण कार्य सम्पन्न हुने बताइएको छ । सो पूल उपभोक्ता समिति मार्फत नै निर्माण हुने मेयर दासले जनाए ।