जनकपुरः होलीमा ६ दर्जन सवारी पक्राउ, एक जनामाथि मुद्दा

न्यूज ब्यूरो, जनकपुरधाम । होली पर्वमा धनुषा प्रशासनले जारी गरेको नीति नियम उलंघन गर्ने ६९ सवारी साधन कारवाही परेको छ ।

जिल्ला प्रहरी कार्यालय धनुषाको रिपोर्ट अनुसार, चैत्त ४ गते र ५ गते दुई दिन मनाइएको होलीको क्रममा टफिक नियम विपरित सवारी चलाएको आरोपमा ६९ वटा सवारी साधनलाई कारवाही गरेको हो ।

होली पर्वलाई मर्यादित एवं व्यवस्थित वनाउनको लागि होली पर्व लक्षित सुरक्षा योजना अनुसार जिल्ला प्रहरी कार्यालय धनुषा तथा मातहत समेतमा जम्मा ४ सय ८७ जना प्रहरी कर्मचारीहरू परिचालन गरिएको थियो ।

ठाउँ ठाउँमा पिकेट, पैदल गस्ती, मोवाईल गस्ती, ट्राफिक सहितको चेक प्वाईन्ट, सरपराईज चेकिङ समेतको व्यवस्थापन गरी मदक पदार्थ सेवन गरी ट्राफिक नियम विपरित सवारी साधनहरू चलाउने मोटरसाईकल ६४ वटा, कार ५ वटा गरी जम्मा ६९ वटा सवारी साधनहरूलाई कारवाही गरिएको जिल्ला प्रहरी कार्यालय धनुषाले जनाएको छ ।

यस्तै, सार्वजनिक स्थानमा हो–हल्ला गर्ने ३ जना मानिस र प्रहरी संग वादविद गर्ने १ जना मानिस समेतलाई नियन्त्रणमा लिएको जनाइएको छ ।

आईतबार ६९ वटै सवारी साधनहरूलाई आवश्यक कारवाही गरि छाडिएको र पक्राउ परेका ४ जना मानिसहरू मध्ये ३ जनालाई समझाई बुझाई गरी आफ्नतको जिम्मा लगाई छाडिएको प्रहरीले जनाएको छ ।

सोही क्रममा होलीको दिन प्रहरी संग वादविद गर्ने जिल्ला जनकपुरधाम उपमहानगरपालिका वडा नं. १६ कपिलेश्वर बस्ने वर्ष १९ को चमन ठाकुरलाई सार्वजनिक शान्ति विरूद्धको कसुर शिर्षक मुद्दा चलाएको प्रहरीले जनाएको छ ।

यसपाली प्रहरी प्रशासन कडा भएपछि कुनै अप्रिय घटना भने भएको छैनन् ।