होलीमा डिजे प्रतिबन्ध, भोली र पर्सी माछामासु तथा दारुमा रोक

न्यूज ब्यूरो, जनकपुरधाम । मधेश प्रदेशको राजधानी जनकपुरधामस्थित दुई दिनसम्म माछामासु विक्री वितरणमा रोक लगाउन प्रशासनले सूचना जारी गरेको छ ।

जिल्ला प्रशासन कार्यालय धनुषाले बुधबार एक सूचना जारी गर्दै मधेशको महाकुम्भ मानिने नेपालकै सबभन्दा लामो पदयात्रा १५ दिने धार्मिक परिक्रमालाई लिएर जनकपुरमा दुई दिन माछामासु र मदिरामा प्रतिबन्ध लगाएको हो । यो प्रत्येक बर्ष प्रशासनले लगाउँदै आएको छ ।

विहिबार र शुक्रबार बिहानदेखि अपरान्हसम्म सार्वजनिक स्थानमा माछा मासु तथा मदिरा विक्री वितरणमा रोक लगाएको हो । होली पर्वलाई समेत ध्यानमा राख्दै सार्वजनिक स्थलमा मात्र मासुजन्य वस्तुहरु विक्री वितरणमा रोक लगाएको हो । व्यक्तिगत घर तथा होटेलमा खान भने कुनै प्रतिबन्ध लगाएको छैनन् ।

पवित्र माध्यमिकी परिक्रमामा देशविदेशबाट साधुसन्त आउने गरेको, श्रद्धालुहरुले गृह परिक्रमा गर्ने भएकोले सार्वजनिक स्थलमा मासुजन्य वस्तुहरु विक्री वितरण नगर्न भनिएको हो ।

यस्तै, होली पर्वको नाममा जथाभावी रँग लगाउने, बाटो हिँडने बटुवालाई जथाभावी रँग लगाउने, बाटो अवरोध गरी रकम असुल्ने जस्ता कार्यहरु नगर्न सूचना जारी गरिएको छ ।

यस्तै, चर्को स्वरमा बाजा नबजाउन तथा डिजे सँचालन नगर्न सूचना जारी गरिएको छ । चर्को साउण्डमा बाजा बजाए, डिजे बजाए गुनासोको आधारमा कानुन बमोजिम कारवाही गरिने जिल्ला प्रशासन कार्यालय धनुषाले जनाएको छ ।