घुस काण्डमा निलम्बनमा परेका जनकपुरका यी वडाध्यक्षलाई अदालतले दियो सफाई

न्यूज ब्यूरो, जनकपुरधाम । पियनसँग मिलेर सेवाग्राहीबाट घुस लिएको आरोपसहित स्वतः निलम्बनमा परेका जनकपुरका एक वडाध्यक्षलाई विशेष अदालतले सफाई दिएको छ ।

वर्षको असोज १५ गते जनकपुरधाम उपमहानगरपालिका– १३ का वडाध्यक्ष शुभनारायण मण्डलले आफ्नो पियनमार्फत सेवाग्राहीसँग घुस लिएको आरोपमा विशेष अदालतमा आरोपत्र दायर भएपछि उनी स्वतः निलम्बनमा परेका थिए ।

नागरिकता प्रमाणपत्रको सिफारिस गर्न घुस लिएको भन्दै अख्तियार दुरुपयोग अनुसन्धान आयोगले विशेष अदालतमा उनी विरुद्ध गत वर्ष आरोपपत्र दायर गरेको थियो ।

विशेष अदालतमा सुनवाइपछि उनलाई सफाइ दिइएको हो । विशेष अदालतबाट सफाइ पाएपछि मण्डलले नेपालको न्याय प्रणाली प्रति पहिलेदेखि नै विश्वास रहे पनि अब त्यो विश्वास झनै बढेको प्रतिक्रिया दिए ।

उनले भने, ‘नेपालको न्याय प्रणालीमाथि मलाई विश्वास थियो, त्यसैले आज म विशेष अदालतबाट सफाइ पाएको छुँ ।’

गत असोज १५ गते एक सेवाग्राहीसँग नागरिकताको सिफारिस गरिदिने वापत घुस लिँदालिँदै २४ हजार रुपैयाँ सहित रँगेहात पक्राउ परेका कार्यालय सहयोगी (पियन) दिलिप कुमार पञ्जियार विरुद्ध मुद्दा दायर भएपछि वडाध्यक्ष मण्डल निलम्बनमा परेका छन् ।

कार्यालय सहयोगी पञ्जियारले सेवाग्राहीलाई आफु नै वडा सचिव रहेको र नागरिकताको सिफारीस आफुले नै गर्ने भन्दै उनीसँग घुस रकम लिएका थिए ।