नेपाली काँग्रेसको सिरहा सभापतिमा यादव दोस्रो पटक विजयी

न्यूज ब्यूरो, सिरहा । नेपाली काँग्रेसको जारी १४ औँ महाधिवेशनको क्रममा सिरहा सभापतिमा पुनः रामचन्द्र यादव विजयी भएका छन् ।

सोमबार सम्पन्न मतदान प्रक्रियाको मतगणना मँगलबार सम्पन्न भएपछि सभापतिको लागि रामचन्द्र यादव ५३९ मतले विजयी भएका छन् ।

सभापतिकै लागि उम्मेदवारी दिएका राम सुन्दर चौधरी भने पराजित भएका छन् । सिरहामा चर्चित नेताको रुपमा रहेका रामचन्द्र यादवले जिल्ला नेतृत्वको लागि अधिक मत ल्याएर विजयी भएका हुन् ।

सोमबार भएको निर्वाचन प्रक्रिया अन्तर्गत भएको मतदानको क्रममा कुल २४७३ मत खसेको मध्ये रामचन्द्र यादवले कुल १४२६ मत प्राप्त गरे भने उनका प्रतिद्धन्द्धी रामसुन्दर चौधरीले ८८८ मत प्राप्त गरेका छन् ।

खसेको मतमध्ये कुल १५९ मत बदर भएको निर्वाचन अधिकृतले जनाएको छ । सोसँगै रामचन्द्र यादव ५३९ मत अधिक ल्याएर विजयी भएको हो ।

सभापतिको लागि रामचन्द्र यादवको प्यानल पहिलेदेखि नै सक्रिय रहेका थिए । रामचन्द्र यादवको लागि सँगठनमा लविँग बढेपछि उनलाई सभापतिमा अधिक मत प्राप्त भएको हो ।