हँसपुर नगरपालिकामा मेयर मण्डलको अडानपछि निमित्त अधिकृतमा यादवले सम्हाले पदभार

न्यूज ब्यूरो, जनकपुरधाम । मधेश प्रदेशको धनुषा जिल्लास्थित हँसपुर नगरपालिकामा कडा रस्साकस्सीपछि नयाँ प्रमुख प्रशासकीय अधिकृतको जिम्मेवारी सम्हालिएको छ ।

हँसपुर नगरपालिकाका मेयर रामज्ञान मण्डलले अडान कसेपछि प्रमुख प्रशासकीय अधिकृतको रुपमा कार्य गर्दै आएका केशव अधिकारीलाई अन्तै सरुवा भएपछि निमित्त प्रमुख प्रशासकीय अधिकृतको रुपमा रामभजन यादवले कार्यभार सम्हालेका छन् ।

निमित्त प्रमुख प्रशासकीय अधिकृतको रुपमा रामभजन यादवले शुक्रबारदेखि नै कार्यभार सम्हालेका छन् । यसअघि निवर्तमान प्रमुख प्रशासकीय अधिकृत केशव अधिकारी र मेयर मण्डलबीच तनाव चल्दै आएको थियो ।

मेयर मण्डल र तत्कालिन अधिकृतबीच आन्तरिक द्धन्द्ध चल्दै आएको कारण हँसपुर नगरपालिकाको विकास निर्माण कार्य ठप्प भएको थियो । शुक्रबार यादवले कार्यभार सम्हालेपछि हँसपुरको कामकाजमा तिव्रता आउने विश्वास मेयर मण्डलले गरे ।

लोकतान्त्रिक समाजवादी पार्टीका नेता समेत रहेका मेयर मण्डललाई त्यहाँ जनता समाजवादी पार्टीका नेता कार्यकर्ताहरुले अधिकृत अधिकारीलाई पनि प्रयोग गर्दै आएका थिए । मेयर मण्डललाई निस्प्रभाव बनाउन मेयर विरुद्ध जसपाका नेता कार्यकर्ताहरु सक्रिय भएपछि अधिकृत र मेयरबीच तनाव बढदै गएको थियो ।

जसपाका कार्यकर्ता बलिराम कापरीले प्रमुख प्रशासकीय अधिकृतको रुपमा केशव अधिकारी नै चाहियो भन्दै विहिबार नगरपालिकाको मुख्यद्धारमा तालाबन्दी गरेको थियो । तर, शुक्रबार नै नयाँ निमित्त प्रमुख प्रशासकीय अधिकृतको रुपमा रामभजन यादवले कार्यभार सम्हालेपछि अवस्था समान्य बनेको हो ।