हँसपुर नगरपालिकाका अधिकृतलाई सरुवा गरेपछि जसपाका कार्यकर्ताले हाने नगरपालिकामा ताला

न्यूज ब्यूरो, जनकपुरधाम । मधेश प्रदेशको धनुषा जिल्लास्थित हँसपुर नगरपालिकामा जनता समाजवादी पार्टीका कार्यकर्ताहरुले ताला हानेका छन् ।

हँसपुर नगरपालिकाका प्रमुख प्रशासकीय अधिकृत केशव अधिकारीलाई आर्थिक वर्षको मध्यमा आएर सरुवा गरेको भन्दै जनता समाजवादी पार्टीका कार्यकर्ताहरुले नगरपालिकामा तालाबन्दी गरेको छ ।

नगर प्रमुख रामज्ञान मण्डलले फर्जी कागजात तयार गरेर प्रमुख प्रशासकीय अधिकृत अधिकारीलाई सरुवा गर्न लगाएको र विकास निर्माणको काममा व्यापक अनियमिता गरेको आरोप सहित जसपाका कार्यकर्ताहरुले दिउँसो नगरपालिका पुगेर तालाबन्दी गरेको हो ।

नगर प्रमुख मण्डलले पुनः नगरपालिकालाई भ्रष्टाचार, अनियमितता गैरकानुनी काम गर्ने मनसायले फर्जी डकुमेन्ट पेस गरि फर्जी हाकिम पठाउने प्रयासको साथै फर्जी कार्यपालिका बैठक गरेको विरुद्धमा ताला लगाइएको जसपाका कार्यकर्ता बलिराम कापरीले बताए ।

उनले अधिकृत अधिकारीको स्थानमा यसअघि जिल्ला विकास समिति धनुषामा कार्यरत रहँदा भ्रष्टाचारको मुद्दा खेपिसकेका रामभजन यादवलाई यहाँ ल्याउने तयारी गरेपछि त्यसको विरोधमा आफूहरूले ताला लगाएको जानकारी दिए ।

धमाधम विकासको काम हुनुपर्ने समयमा अनुभवी अधिकृतलाई सरुवा गराएर विकास अवरुद्ध गर्ने कार्यमा स्वयं नगरप्रमुख मण्डल नै लागेको कापडीले आरोप लगाए ।

यसअघि आर्थिक प्रशासनको खाताहरु समेत रोक्का गरेका मेयरलाई उच्च अदालतले कानुन सम्झाएपछि खाता सँचालनमा आएको थियो । सुरुदेखि नै अधिकृत अधिकारी र मेयर मण्डलबीच विवाद चल्दै आएको थियो ।

नगर प्रमुख मण्डल लोकतान्त्रिक समाजवादी पार्टीका हुन भने अधिकृत अधिकारी जसपाबाट आस्था राख्ने अधिकृतको रुपमा चिनिन्छन् । राजनीतिक हिसाबले पनि दुवै जनाबीच निरन्तर विवाद चल्दै आएको थियो ।