आज मधेश सरकारको चौथो वार्षिकोत्सव, प्रदेशसभाको बैठक फागुन १० गते बस्ने

न्यूज ब्यूरो, जनकपुरधाम । प्रदेश स्थापना दिवसको अवसर पारेर प्रत्येक वर्ष बार्षिकोत्सव मनाउँदै आएको मधेश सरकारको वार्षिकोत्सव कार्यक्रम आज हुने भएको छ ।

मँगलबार बिहान १०ः३० बजे मुख्यमन्त्री तथा मन्त्रिपरिषदको कार्यालयभित्र मुख्यमन्त्रीको निवासमा वार्षिकोत्सव कार्यक्रमको आयोजना गरिएको गरिएको हो ।

यसअघि गत माघमै आयोजना हुने भनिएको वार्षिकोत्सवको लागि जानकी मन्दिरमा निर्माण गरेको टेन्ट र सम्पूर्ण तयारी हावाहुरीले उडाएपछि वार्षिकोत्सव स्थगित भएको थियो ।

प्रत्येक वर्ष प्रदेशसभामा उत्कृष्ट भूमिका निर्वाह गर्ने एक जना प्रदेशसभाका सदस्यलाई रु. ५० हजारसहित पुरस्कृत गर्ने गरिएको छ ।

चौथो वार्षिकोत्सवको अवसरमा यसअघि विभिन्न प्रकारका कार्यक्रम आयोजना भए पनि अन्तिम दिन भव्य कार्यक्रमसहित वार्षिकोत्सव मनाउने तय भए पनि अन्तिम क्षणमा आएर कार्यक्रम स्थगित भएको थियो ।

यस्तै, मधेस प्रदेशको प्रदेशसभाको बैठक फागुन १० गते मङ्गलवार बस्ने भएको छ । प्रदेशसभा सचिवालयले फागुन १० गते मङ्गलबार दिउँसो २ बजे बस्ने गरी प्रदेशसभाको बैठक आह्वान गरेको हो । आइतबार बस्ने भनिएको प्रदेशसभाको बैठक विशेष कारण देखाउँदै स्थगन गरिएको थियो ।

प्रदेशसभा बैठकमा प्रदेश सरकारद्वारा प्रस्तुत प्रदेश प्रहरी ऐन कार्यान्वयनसम्बन्धी सङ्कल्प प्रस्तावमाथि छलफल हुने प्रदेशसभा सचिवलायले जनाएको छ । गत माघ २६ गते बसेको प्रदेशसभाको बैठकमा प्रदेश सरकारका आन्तरिक मामिला तथा सञ्चारमन्त्री भरतप्रसाद साहले सो सङ्कल्प प्रस्ताव पेश गरेको थियो ।

सो बैठकमा प्रदेशसभा सदस्य ज्ञानेन्द्रकुमार यादव, रवीन्द्र बैठा, जगतप्रसाद यादव, जैनुल राइन, परमेश्वर साह, शिवचन्द्र चौधरी, नरेशकुमार यादव, अभिराम शर्मा, किशोरी साह (कमल), रिना यादव, रामअशिष यादवलगायतले सरकारद्वारा ल्याइएको सङ्कल्प प्रस्तावमाथि आ–आफ्ना धारणा राखेको थियो ।