जनकनन्दिनी गाउँपालिकामा दाईजो प्रथा विरुद्ध सडक नाटक प्रदर्शन

न्यूज ब्यूरो, जनकपुरधाम । पूर्वी धनुषाको जनकनन्दिनी गाउँपालिकामा मधेशमा जडो गाडेको दाईजो प्रथा विरुद्ध जनचेतनामूलक सडक नाटक प्रदर्शन गरिएको छ ।

जनकनन्दिनी गाउँपालिकाको विभिन्न स्थानमा मधेशका चर्चित कलाकारहरुद्धारा जनचेतनामूलक सडक नाटक प्रदर्शन गरिएको हो ।

जनकनन्दिनी गाउँपालिकाको आयोजना तथा आर्थिक सहयोग एवम् त्रिनेत्र ट्रेन्र्स प्रा.लि.को समन्वयमा जनकनन्दिनी गाउँपालिकाको १ देखि ६ वडामा नाटक प्रदर्शन गरिएको हो ।

नाटक प्रदर्शनको माध्यमबाट आम नागरिकमा जनचेतना फैलाउने उदेश्यले शुक्रबार जनकनन्दिनी गाउँपालिकाको वडा नम्बर १ को मलहनियाँ, वडा नम्बर २ को शिवमन्दिर बल्हा, वडा नम्बर ३ को लवटोली गाउँ, वडा नम्बर ४ को खजुरी बजार, वडा नम्बर ५ को उदहा समुदायिक फिल्ड र वडा नम्बर ६ को शिवमन्दिर कठालस्थित दाईजो प्रथा विरुद्ध सडक नाटक प्रदर्शन गरिएको हो ।

नाटकमा मिथिला मधेशको चर्चित, नाम चलेका र छिमेकी मुलुक भारतसम्म समेत रुचाइएका मैथिली सिनेकर्मी बि.एन. पटेल, रिना यादव सहित ज्योति झा, दिनेश साह, भाग्यचरण यादव, बीरेन्द्र साह लगायतले अभिनय देखाएका थिए ।

सडक नाटक हेर्नको लागि विभिन्न टोलका स्थानीय युवा, महिला, पुरुषवर्गहरुसँग बीच बीचमा फोरम समेत गरिएको थियो । दाईजो प्रथा विरुद्ध लडनको लागि समाजको भूमिकामाथि विशेष केन्द्रीत गरिएको थियो ।

तराई मधेशको जिल्लाहरुमा दाईजो बिना विवाह नै नहुने, विहे रोकिने, हत्या हुने लगायतका घटनालाई दर्साउँदै अरुको धन लिएर अर्थात दाईजो लिएर कोही पनि धनी नहुने रहेछ भन्ने सार दिएको थियो । बिना दाईजो विवाह गर्दा आपसी सदभाव सदैव कायम रहने भावहरु दर्साएको थियो ।

वर्तमान समयमा दाईजो लिएर मात्र विवाह हुने, केटी पक्षले जसरी पनि दाईजो दिनैपर्ने, छोरी बोझ बन्ने जस्ता घटनालाई साकारात्मक तवरले प्रदर्शन गरिएको थियो । नाटकको क्रममा दर्शकहरुले कलाकारहरु सहित जनकनन्दिनी गाउँपालिकालाई समेत धन्यवाद ज्ञापन गरेको थियो ।