वीरगँजका मेयर विरुद्ध जसपाकै युवाहरुले 'मेयर चोर' भन्दै गरे नारावाजी

न्यूज ब्यूरो, वीरगँज । वीरगञ्ज महानगरका नगरप्रमुख (मेयर) विजयकुमार सरावगीविरुद्ध उनकै पार्टी जसपाका कार्यकर्ताले नाराबाजी गर्दै विरोध प्रदर्शन गरेका छन् ।

स्वास्थ्य चौकी उद्घाटन गर्न वीरगञ्ज महानगरपालिका वडा नम्बर १५ स्थित लक्षमनवा पुगेका मेयर सरावगीलाई लछारपछार गर्दै जसपाकै कार्यकर्ताले विरोध गरेका हुन् ।

उपेन्द्र यादव सङ्घीय सरकारको स्वास्थ्यमन्त्री हुँदा पार्टीको पहलमा आएको बजेटबाट निर्मित स्वास्थ्य चौकीको उद्घाटन कार्यक्रममा मेयर सरावगीले कार्यकर्ताहरुलाई वाइपास गरेको आरोप लगाउँदै उनीहरुले विरोध गरेको बताएका छन् ।

विरोधमा उत्रेका कार्यकर्ताहरुले मेयर सरावगीलाई स्वास्थ्य चौकीको मूल गेटमै रोकेका थिए । उनि प्रवेश गर्न खोज्दा एकछिन मेयर सरावगीसँग आएका सचिवालयका व्यक्ति र विरोधमा उत्रेका कार्यकर्ताहरु बीच तानातानसमेत भएको थियो ।

तानातानकै बीच सुरक्षाकर्मीहरुले सरावगीलाई भित्र पाएका थिए भने कार्यकर्ताहरुले “मेयर सरावगी चोर हो” नारा लगाउँदै एक छिन नाराबाजी लगाउँदै विरोध जनाएका थिए ।

पार्टीको पहलबाट आएको बजेटले निर्मित ठाउँको उद्घाटन गर्दा पार्टीलाई बाइपास गरेर विपक्षीलाई प्राथमिकता दिने मेयरको आफुहरुले विरोध गरेको भन्दै जसपा निकट विद्यार्थी संगठनका नेता हरेन्द्र साहले प्रश्न गरे, “निर्वाचनमा उहाँको लागि हामीले खट्ने, पार्टीको लागि योगदान हामीले दिने तर पार्टीको पहलमा बनेको स्वास्थ्य चौको उद्घाटनमा मेयरले हामीलाई वाइपास गर्ने ?

यता मेयर सरावगीले पार्टी भित्रका उच्छृंखल तत्त्वहरुले केही व्यक्तिको उकसाहटमा आफूविरुद्ध सुन्योजित ढंगले विरोध भएको प्रतिक्रिया दिए ।

“पार्टी भित्र रहेका गलत र अराजक तत्वहरुको उकसाहटमा केही उच्छृंखल व्यक्तिले मेरो सुन्योजित तरिकारले मेरो विरोध गरेका छन् ।

महानगरले बनाएको स्वास्थ्य चौकीमा कार्यकर्ता बोलाउनु कुनै औचित्य छैन । जबरजस्तीको विरोध गरिएको हो,” मेयर सरावगीले भने ।

स्वास्थ्य मन्त्रालयले दिएको ४२ लाख रुपैयाँको लागतमा स्वास्थ्य चौकी निर्माण भएको मेयर सरावगीले जानकारी दिए ।