शहिदनगरको यदुकूहामा स्वर्गद्धारी निर्माण हुँदै

न्युज ब्यूरो, जनकपुरधाम । धनुषाको शहिदनगर नगरपालिकाले जनकपुरधाम जस्तै स्वर्गद्धारी निर्माण कार्य सुरु गरेको छ ।

शहिदनगर नगरपालिकाको वडा नम्बर ३ यदुकूहास्थित स्वर्गद्धारी (शमसानघाट) निर्माण हुन लागेको हो । नगरपालिकाको आर्थिक सहयोगमा नगरवासीको सुविधाको लागि स्वर्गद्धारी निर्माण गर्न लागिएको हो ।

शहिदनगर नगरपालिकाको यदुकूहा र ताराटोलकोबीचमा सो स्वर्गद्धारी निर्माण गर्न लागिएको नगर प्रमुख उदय कुमार बरबरिया(यादव) ले जानकारी दिए ।

बुधबार नगर प्रमुख बरबरिया र वडा नम्बर ३ का वडाध्यक्ष नागेन्द्र प्रसाद मण्डलले सँयुक्त रुपमा शमसानघाटको शिलान्यास गरेका हुन् । नगरस्तीय बजेटबाट ५ लाखबाट सुरु हुने सो शमसानघाटलाई थप बजेट दिँदै जनकपुरधामकै स्वर्गद्धारी अवधारणामा निर्माण हुने बताइएको छ ।

स्थानीय समाजसेवी श्याम चौधरीले आफनो जमिन उपलब्ध गराएपछि यदुकूहामा स्वर्गद्धारी निर्माण हुन लागेको मेयर बरबरियाले थपे ।