३२ दिनपछि कमला नगरपालिकाको ताला फुट्यो, भोलीदेखि सबै कामकाज सुचारु

न्यूज ब्यूरो, जनकपुरधाम । निरन्तर विवादमा रहँदै आएको पूर्वी धनुषाको कमला नगरपालिकामा लगाइएको ताला आज आईतबार ३२ दिनपछि फुटाइएको छ ।

कमला नगरपालिकाका नगर प्रमुख राम उदगार गोईत र प्रमुख प्रशासकीय अधिकृत सुबोध कुमार ठाकुरबीचको आन्तरिक असहमतिको कारण विगत ३२ दिनदेखि लगाइएको ताला खुल्न सकेको थिएनन् ।

उपभोक्ता समितिहरुले धरौटी फिर्ताको माग गर्दै गत पुस १४ गते लगाएको ताला आज ३२ दिनपछि उपमेयर, वडाध्यक्षहरुले फुटाएका हुन् । उनीहरुले आजित भएर ताला फुटाउन बाध्य भएको बताएका छन् ।

आईतबार दिउँसो ३ः३० बजेको समयमा कमला नगरपालिकाको मुख्यद्धारमा लगाइएको ताला नगरपालिकाकी उपप्रमुख शिला देवी मण्डलको अगुवाईमा ३२ दिनदेखि लगाइएको ताला खोलिएको छ ।

नगरपालिका मार्फत विकास निर्माणको काम गरेका उपभोक्ता समितिहरुले धरौटी फिर्ताको माग गर्दै गत पुस १४ गते विहिबारको दिन तालाबन्दी गरेको थियो ।

तालाबन्दी निरन्तर भएपनि नगर प्रमुख र प्रमुख प्रशासकीय अधिकृतबीच आपसी समझदारी समेत हुन नसक्दा ताला खुलाउन पहल हुन सकेको थिएनन् । नगर प्रमुख गोईत र अधिकृत ठाकुरबीच ताला सम्बन्धी कुनै चासो नहुँदा अन्य जनप्रतिनीधिहरुले ताला फुटाएको हो ।

नगरपालिकाका मुख्यद्धारमा लगाएको ताला र कार्यालय प्रमुखको कार्यकक्षमा लागेको ताला फुटाइएको हो । उपमेयरसँग वडा नं. १ का वडाध्यक्ष राजकुमार यादव, वडा नं. २ का धनेश्वर यादव, ३ का विशेश्वर यादव र ८ का राजेश्वर मरिक (यादव), उपभोक्ता समितिका जीतनारायण यादव, स्थानीय, सँचारकर्मीको रोहबरमा ताला फुटाएको हो ।

निरन्तर दुई महिनादेखि कार्यालय बन्द हुँदा स्वास्थ्य समस्याले नगरपालिकावासी छटपटाउँदा पनि सेवा दिन कठिनाई हुन थालेपछि बाध्य भएर ताला फुटाएको उपमेयर मण्डलले बताइन् ।

जनताहरु आफूहरुसँग चरम गुनासो गर्न थालेछि बाध्य भएर ताला फुटाएको प्रतिक्रिया दिइन् । यसको लागि मेयर गोईतलाई समेत कैयौँ पटक ताला खुलाउन आग्रह गरेपनि चासो नलिँदा ताला फुटाउन बाध्य भएको उनले बताइन् ।

“कति जनाको आफन्त हस्पिटलमा छ, उनीहरु सेवाको लागि नगरपालिका आउँछन तर नगरपालिकामा तालाबन्दी देखेपछि आफूहरुलाई सराप्ने गरेको छ । वडा कार्यालयहरुमा जन्मदर्ता बनाउनको लागि कागजात छैनन, अन्य समानहरु छैनन । जनताहरु गाली गर्न थालेपछि ताला फुटाएर नगरपालिकाको कार्यालय कम्तीमा सँचालनमा ल्याउन बाध्य भएका छौँ ।”– उपप्रमुख मण्डलले भनिन् ।

विगत ३२ दिनदेखि नगरपालिका बन्द हुँदा स्वास्थ्य सेवामा सबभन्दा अधिक असर परेको थियो । खोप र स्वास्थ्यचौकी बाहेकका कामहरु सबै ठप्प रहँदै आएको थियो । जनताहरुले जनप्रतिनीधिलाई लखेटने चेतावनी दिएपछि बाध्य भएर ताला फुटाएको हो ।

ताला फुटाएर अवस्थाको भिडियो रेकर्ड गरी राखिएको बताइएको छ । मुख्यद्धारदेखि भित्रसम्मको सबै कागजात, जिन्सी समान, कार्यालय भित्रको भिडियो रेकर्ड गरी सुरक्षित राखिएको हो ।

वडाध्यक्ष धनेश्वर यादवले नगरपालिकाको प्रशासनीक कार्य सँचालन गरेर पनि विवाद मिलाउन सकिने बताउँदै नगरपालिका बन्द हुँदा आम नागरिकहरु आजित भएपछि आफूहरु बाध्य भएको बताए ।

यता, नगर प्रमुख राम उदगार गोईत र अधिकृत ठाकुरबीच समेत आपसी सहमति भई कार्य सँचालन गर्न राजी भएको बुझिएको छ ।