सिके राउतको यही रबैया रहे हामी प्रतिकार गर्न बाध्य हुन्छौँः अध्यक्ष यादव

न्यूज ब्यूरो, जनकपुरधाम । जनता समाजवादी पार्टी (जसपा) नेपालका धनुषा जिल्ला अध्यक्ष पशुपति यादवले डा. सिके राउतको आन्दोलनको तौर तरिका यस्तै रहे प्रतिकार गर्न बाध्य हुने चेतावनी दिएका छन् ।

गत माघ ५ गते मधेश प्रदेशको रौतहटस्थित गौरमा डा. सिके राउत नेतृत्वको जनमत पार्टीले देखाएको तरिकाप्रति आपत्ति जनाउँदै यस्तै रबैया रहे बचाउमा डिफेन्स गर्न बाध्य हुने चेतावनी दिएका छन् ।

प्रत्येक बर्ष जनता समाजवादी पार्टीले मनाउँदै आएको बलिदानी दिवसमा पनि जनमतका कार्यकर्ताहरुले एक महिला र त्यसमाथि पनि मन्त्रीउपर गरेको व्यवहार अशोभनीय बताउँदै सोही तरिका दोहरयाए प्रतिकार गर्न बाध्य हुने बताएका छन् ।

न्यूज ब्यूरोसँगको कुराकानीमा अध्यक्ष यादवले जनमत पार्टीका नेता कार्यकर्ताहरुले जहिले पनि जसपालाई लक्षित गर्दै आएको आरोप लगाए । उनले तराई मधेशमा जनता समाजवादी पार्टीसँग मतभेद गरेर आफू हाईलाईट हुन मात्र खोजेको पनि बताए ।

उनले भने, –“हामी वीर शहिदहरुको सम्झनामा प्रत्येक बर्ष मधेश प्रदेशको विभिन्न जिल्लामा बलिदानी दिवस मनाउँदै आएका छौँ । हाम्रो कार्यक्रम पूर्व निर्धारित थियो, जनमतको पनि निर्धारित कार्यक्रम थियो, त्यहाँ सबभन्दा ठुलो चुक भनेको प्रशासनको छ । त्यहाँ अवस्था बिग्रन लागेकै थियो, तर, मन्त्री ज्यू अर्को बाटो भएर कार्यक्रम स्थल पुगेपछि अवस्था उग्र भएन । नभए जनमतका कार्यकर्ताहरुले लाठी, भाटा, बाँस लिएर एक मन्त्रीमाथि आक्रमणको प्रयास त गरेकै थियो ।”

संघीय सरकारकी भौतिक पूर्वाधार तथा यातायात मन्त्री रेणु कुमारी यादवको अभिव्यक्तिप्रति अध्यक्ष यादवले मन्त्री यादवले चेताएको मात्र बताएका छन् । मन्त्री यादवले जनमत पार्टीका नेता कार्यकर्ताहरुलाई यस्तो नगर्न सुझाव मात्र दिएको बताए ।

मन्त्री यादवको अभिव्यक्तिलाई लिएर अहिले मधेशसहित देशैभरि चुलिएको चर्चाको विषयमा अध्यक्ष यादवले डा. सिके राउत एमालेबाट परिचालित रहेको आशँका जनाए । उनले अहिले मन्त्री यादवको विरोधमा एमाले पार्टी पनि विरोध जनाउनु भनेको जनमत पार्टीसँग एमालेको साथ रहेको आशंका गरे ।

उनले भने, –“यो आशंका मात्र छ, जुन तौर तरिकाले आन्दोलनहरु भईरहेको छ, नारावाजीहरु भईरहेको छ , यस हिसाबले त एमाले पार्टी र जनमत पार्टी एक भएको आशंका छ । ”

आन्दोलन गर्न स्वतन्त्रता रहेको बताउँदै अध्यक्ष यादवले तरिका परिवर्तन गर्न सुझाव समेत दिए । “जनमतको आन्दोलनमा कथित किसानहरु छन्, असल किसानहरु देखिएनन् ।” उनले भने ।

किसानको समस्या विगत कैयाँै बर्षदेखि रहिआएको भन्दै उनले किसानकै आन्दोलन भए किसानसँग बसेर, छलफल गरेर, विचारविमर्स गरेर कहिले पनि आन्दोलन नगरेको आरोप लगाए ।

उनले भने, –“जति जनमत पार्टीसँग युवा, विद्यार्थी, महिलाहरु छन्, त्यति जनता समाजवादी पार्टीसँग छैन ? जहिले पनि जसपालाई लक्षित गरी मात्र आन्दोलन गरेको छ , तर अब रबैया परिवर्तन नगरे हामी प्रतिकारमा जान बाध्य हुनेछौँ ।”

उनले केही मिडियाहरु समेत मन्त्री यादवको अभिव्यक्तिलाई बग्याएको आरोप लगाए । उनले आन्दोलनको तौर तरिका परिवर्तन गरेर मात्र किसानको लागि आन्दोलन गर्नुपर्ने सुझाव दिए ।

जनता समाजवादी पार्टी सधैदेखि किसानको लागि अग्रसर रहँदै आएको बताउँदै उनले जसपाबाटै मन्त्री भएका महेन्द्र राय यादवले किसानको कैयाँै समस्या समाधान रहेको दाबी गरे ।

गत माघ ५ गते रौतहटको गौरमा आयोजित बलिदानी दिवसको अवसरमा संघीय मन्त्री रेणु कुमारी यादवले हिँसात्मक झल्किने खालको अभिव्यक्ति दिएपछि अहिले राजनीतिकि माहौल गरम भएको छ ।