४ दिनपछि जसपाको विज्ञप्तिः जनमत पार्टी गौरमा हिँसा भडकाउन सँलग्न थियो

न्यूज ब्यूरो, जनकपुरधाम । आफ्नै अभिव्यक्तिले चारैतर्फबाट फँसेकी जनता समाजवादी पार्टी (जसपा) नेपालकी केन्द्रीय सदस्य एवम् केन्द्रीय मन्त्री रेणु कुमारी यादवको बचाउको लागि जसपाले ४ दिनपछि प्रेस विज्ञप्ति जारी गरेको छ ।

गत माघ ५ गते मधेश प्रदेशको रौतहट जिल्लाको गौर स्थित आयोजना गरिएको बलिदानी दिवसको अवसरमा दिएको अभिव्यक्तिपछि चौतर्फी घेरामा परेकी मन्त्री यादवलाई बचाउको लागि जसपाले ४ दिनपछि विज्ञप्ति जारी गर्दै जनमत पार्टीले हिँसा भडकाउनमा सँलग्न रहेको बताएको छ ।

शनिबार पार्टीले जारी गरेको प्रेस विज्ञप्तिमा मन्त्री यादवमाथि जनमत पार्टीका कार्यकर्ताहरुले लाठी, भाटा, ढुँगा लिएर उच्छृँगल, गैर राजनीकि गतिविधि र क्रियाकलापमा सँलग्न रहेको दाबी गरिएको छ ।

पार्टीका केन्द्रीय कार्यालय प्रमुख प्रकाश अधिकारीद्धारा जारी गरिएको विज्ञप्तिमा भनिएको छः “जनता समाजवादी पार्टीको केन्द्रीय कार्यकारिणी सदस्य एवम् भौतिक पूर्वाधार तथा यातायात मन्त्री माननीय रेणु कुमारी यादवको प्रमुख आतिथ्यमा समाजवादी युवा संघ नेपालको आयोजनामा रौतहटमा आयोजित बलिदानी दिवसको कार्यक्रमलाई जनमत पार्टीको नाममा उक्त पार्टीका नेता तथा कार्यकर्ताहरु सुनुयोजित ढँगबाट लाठी, भाटा, ढुँगा आदी लिई उक्त कार्यक्रमलाई अवरोध गर्ने, कार्यक्रम विथोल्ने, आतँक मच्चाउने र हिँसा भडकाउने जस्ता गैर राजनीतिक एवम् अपराधिक क्रियाकलापमा सँलग्न थिए ।”

यसका साथै जसपाले सोही विज्ञप्ति मार्फत जनमत पार्टीद्धारा गराइएको त्यस्तो गतिविधिको विरोध गर्दै यस्ता गतिविधि नियन्त्रणको लागि सरकारसँग आग्रह गरेको छ । जनमतको गतिविधिको विरोध गर्दै जसपाले निन्दा समेत गरेको छ ।

अब उपरान्त जनता समाजवादी पार्टीलाई केन्द्रीत गरी कुनै पनि यस्ता कार्य नगर्न र नगराउन सचेत गराउँदै नेपाल सरकारसँग यस्तो क्रियाकलाप नियन्त्रणको लागि आग्रह समेत गरेको छ ।

ज्ञातव्य छ, गत माघ ५ गते गौरमा आयोजना गरिएको बलिदानी दिवसको क्रममा विगत एक महिनादेखि आन्दोलनरत किसानहरुले मन्त्री यादव कार्यक्रममा गएपछि उनलाई लखेटेको थियो ।

लखेटिएपछि आक्रोसित भएकी मन्त्री यादवले गौर नरसंहार सम्झाउँदै अर्को गौर घटना दोहरयाउने चेतावनी सहित प्रदर्शनकारी र डा. सिके राउतलाई यस्तै हालात गरिने धम्की दिएकी थिइन् ।

सो अभिव्यक्तिपछि उनको चारैतर्फ आलोचना भएको छ भने विभिन्न राजनीतिक दलका नेताहरुले उनलाई पदबाट बर्खास्त गर्न दबाब समेत दिएको छ । यद्यपी, मन्त्री यादवले आफ्नो अभिव्यक्तिको त्यो भाव नरहेको दाबी गरेकी हुन् ।

गौर नरसंहार घटनामा जसपाका अध्यक्ष उपेन्द्र यादवको पनि नाम मुछिएको छ । मन्त्री यादवको अभिव्यक्तिपछि गौर नरसंहारमा तत्कालिन मधेशी जनअधिकार फोरमको प्रत्यक्ष सँलग्नता रहेको अडकल गरिएको छ ।