किसान आन्दोलनको क्रममा पक्राउ परेका जनमतका जिल्ला अध्यक्षसहित तीनै जना रिहा

न्यूज ब्यूरो, जनकपुरधाम । किसान आन्दोलनको क्रममा पक्राउ परेका जनमत पार्टीका तीन नेता कार्यकर्ता रिहा भएका छन् ।

गत पुस १९ गते जनमत पार्टीको पूर्वपश्चिम राजमार्ग बन्दको घोषणाको क्रममा आन्दोलनरत रहेकोको बेला घुसपैठ गरी अन्य कसैले ट्रकमा आगजनी गरेको आरोपमा जनमतकै तीन जनालाई प्रहरीले पक्राउ गरी मुद्दा चलाएको थियो ।

रिहा हुनेहरुमा जनमत पार्टीका धनुषा जिल्ला अध्यक्ष ओम विक्रम कुशवाहा, जिल्ला सचिव नविन पण्डित र जिल्ला सदस्य चन्द्रकिशोर साह रहेका छन् । उनीहरु गत पुस १९ गते पक्राउ परेका थिए ।

प्रदेश नम्बर २ को धनुषा जिल्लाको गणेशमान चारनाथ नगरपालिका वडा नं। १ छघरियास्थित जनमत पार्टीका कार्यकर्ताहरुले ट्रकमा आगजनी गरिदिएको जिल्ला प्रहरी कार्यालय धनुषाले जनाएको छ ।

पुस १९ गते करिब ३ः२० बजेको समयमा पश्चिमबाट पूर्व तर्फ जाँदै गरेको ना १ क ७७६९ नम्बरको ट्रकमा अज्ञात समूहले आगजनी गरिदिएपछि आन्दोलनमा होमिएको जनमत पार्टीमाथि आरोप लगाउँदै पक्राउ गरेको थियो । त्यतिबेला पनि उनीहरुले आफूहरुको प्रदर्शन २ बजेसम्म मात्र रहेको र ट्रक जलाउने कुरा अस्विकार गरेका थिए ।

सो दिन पश्चिमबाट पूर्वतर्फ खाली सिसिबोतल लोड गरी जाने क्रममा जनमत पार्टीले आह्वान गरेको बन्दमा ट्रक चलाएको भन्दै आगजनी गरेको आरोपमा पक्राउ परेका थिए ।

जिल्ला अदालत धनुषाले तीनै जनालाई शुक्रबार सधारण तारेखमा रिहा गरेको हो । रिहा भएपछि तीनै जनालाई फूलमाला, अबिर लगाएर स्वागत गर्दै झुठो मुद्दा खारेजीको माग गरेको थियो ।

किसानहरुलाई समयमा मल, खाद, बीउ उपलब्धताको माग गर्दै डा. सिके राउत नेतृत्वको जनमत पार्टीले किसान आन्दोलनमा होमिएको छ। सोही क्रममा पूर्व पश्चिम राजमार्ग अनिश्चितकालको लागि बन्दको आह्वान गरेको थियो ।