धनुषामा काका भतिजोबीच दियादी झगडा, पाँच जना घाईते, भतिजोको टाउकोमा २० टाँका

न्यूज ब्यूरो, जनकपुरधाम । मधेश प्रदेशको धनुषा जिल्लाको शहिदनगर नगरपालिकास्थित दुई दियाद (दाजुभाईको नाता) बीच झगडा हुँदा पाँच जना घाईते भएका छन् ।

धनुषाको शहिदनगर नगरपालिका वडा नम्बर १ बडकी चिरैया टोलस्थित स्थानीय देवनारायण यादव र नैन कुमार यादवबीच भएको दियादी भगडामा पाँच जना घाईते भएका छन् ।

गत सोमबार अपरान्ह करिब ५ बजेको समयमा पुरानो रिसबीको कारण काका देवनारायण यादव र भतिजो नैन कुमार यादबबीच समान्य भनाभन भएको थियो । केही बेरमै विवाद उग्र भएपछि हानाहान भएको एक स्थानीयले नाम नखोल्ने शर्तमा बताए ।

विवाद हुँदा दियाद नै रहेको देवनारायण र नैनकुमारबीच कुटाकुट हुँदा देवनारायण पक्षले नैन कुमारलाई धमाधम रड प्रहार गरेको घाईते मध्येको राम अवतार यादवले बताए ।

साँझ करिब ५ बजेको समयमा काका देवनारायण यादवले भतिजो नैन कुमार यादवको दरबाजामा गएर पुरानो जमिन सम्बन्धीको विवादको बारेमा बोल्न थालेको थियो । बोल्दाबोल्दै केही बेरमा विवाद भएको थियो ।

देवनारायण पक्षबाट ४ जनाको समूह नैन कुमारको घरमा गएको बताइएको छ । भनाभनपछि भएको विवादपछि देवनारायणले नैन कुमारमाथि धमाधम रड, भाटा प्रहार गरी गम्भिर घाईते बनाएको बताइएको छ ।

सो घटनामा नैन कुमार यादव, सँजीत यादव, राम अवतार यादव, सुरेखा यादव र राम सकिला यादव घाईते भएको जनाइएको छ । त्यसमध्ये सुरेखा यादवको हात पूर्णरुपले भाँचिएको र उनको अवस्था गम्भिर रहेको बताइएको छ ।

नैन कुमारको टाउकोमा प्रहार गर्दा उनको टाउकोमा गम्भिर चोट लागेको छ भने टाउकोमा २० वटा टाँका लागेको सोही ठाउँमा एक स्थानीयले बताए । यद्यपी, यसबारे प्रहरीले अनभिज्ञता प्रकट गरेको छ ।

ईलाका प्रहरी कार्यालय सबैलाका मुद्दा शाखाका शिवशँकर यादवले बडकी चिरैया टोलमा भएको यस्तो घटनाको बारेमा अहिलेसम्म कुनै जानकारी नै नआएको प्रतिक्रिया दिए । उनले भने, –“प्रहरी चौकी खरियानीमा रिपोर्ट भएको हुन सक्छ, तर मलाई थाहा भएन ।”

घाईतेहरुको उपचार राजधानी जनकपुरधामस्थित जानकी हेल्थ केयरमा भईरहेको बताइएको छ । सोमबार साँझ नै उनीहरुलाई सो हस्पिटलमा भर्ना गरिएको बताइएको छ ।

नैन कुमार यादवमाथि देवनारायण यादवले राजनीतिक आस्था पार्टीको हिसाबले समेत प्रहार गरेको जनाइएको छ । पुरानो रिसबी बहाना मात्र भएको बताउँदै घाईते राम अवतारले पार्टीगत उक्साहटमा कुटपिट गरेको बताए ।

त्यसको लागि जनता समाजवादी पार्टी शहिदनगरका नगर अध्यक्ष दिनेश यादवको ईसारामा घटना भएको दाबी गरिएको छ । घाईते भएकाहरु नेकपा माओवादी केन्द्रसँग आस्था राख्छन् भने कुट्नेहरु जसपासँग आस्था राख्ने गरेको बताइएको छ ।

यद्यपी, यस घटनाबारे के कसरी र किन भएको भन्ने बारे प्रहरीले पनि अनभिज्ञता जनाउँदै घटनाको बारेमा निवेदन दिए अनुसन्धान थाल्ने बताएको छ ।

यता, स्थानीयहरुले घटना भएकै दिन ईलाका प्रहरी कार्यालय सबैलाबाट प्रहरी आएको दाबी गरेको छ । घटनालाई लुकाउने प्रयास समेत गरिरहेको तथा प्रहरीको मिलोमत्तो हुन सक्ने आरोप घाईतेहरुले लगाएका छन् ।