मधेश प्रदेशमा भोली बुधबार पनि सार्वजनिक विदा

न्यूज ब्यूरो, जनकपुरधाम । प्रदेशको नामाकरण र स्थायी राजधानी पाएपछि मधेश सरकारले मँगलबार अपरझट सार्वजनिक विदाको घोषणा गरेको छ भने भोली पनि सार्वजनिक विदा हुने भएको छ ।

मधेश सरकारले प्रत्येक वर्ष मनाउने बलिदानी दिवसको अवसरमा बुधबार (भोली) पनि सार्वजनिक विदाको घोषणा गरिएको हो । प्रत्येक वर्ष माघ ५ गते सार्वजनिद विदा दिइन्छ ।

मधेश सरकारको राजपत्रमा उल्लेख भए बमोजिम क्यालेण्डर अनुसार मधेश प्रदेशको ८ वटा जिल्लामा भोली बुधबार पनि एक दिने सार्वजनिक विदा हुने भएको छ ।

वि.सं. २०६२/०६३ को मधेश आन्दोलनको क्रममा आफ्नो ज्यानको आहुति दिएका मधेशका वीर शहिदहरुको सम्झनामा भोली १४ औं बलिदानी दिवस मनाउन एक दिने सार्वजनिक विदा हुने भएको छ ।

मधेश सरकारको आयोजनामा प्रत्येक वर्ष सिरहाको लहानमा मनाउँदै आएको बलिदानी दिवस यसपाली कहाँ मनाउने भने अझै तय भइसकेको छैनन् । बलिदानी दिवसको अवसर पारेर मधेश सरकारले भोली सार्वजनिक विदा कलेण्डर अनुसार दिएको हो ।

०६३ माघ ५ मा भएको मधेस आन्दोलनको क्रममा लहानमा पाँच जनाले ज्यान गुमाएको दिनको सम्झनामा मनाइँदै आएको बलिदानी दिवसको अवसरमा विदा दिएको हो ।

२०६३ माघ १ गतेदेखि लागू भएको अन्तरिम संविधानमा संघीयता र समानुपातिक निर्वाचन प्रणालीको माग गर्दै शुरु भएको आन्दोलनमा माघ ५ गते लहानमा विद्यार्थी रमेश महतोको गोली लागेर मृत्यु आन्दोलन देशव्यापी भएको थियो ।

त्यो आन्दोलनमा क्रममा सिरहाका विभिन्न ठाउँका पाँच जनाले शहादत प्राप्त गरेका थिए भने तीन दर्जन भन्दा बढी घाइते भएका थिए ।

सोही शहादतको सम्झनामा २०६४ देखि नै प्रत्येक वर्ष माघ ५ गते मधेशको बलिदानी दिवस मनाउन थालेको हो । प्रदेश सरकार मन्त्रीपरिषद्को बैठकले माघ ५ गते बलिदानी दिवस मनाउन कलेण्डरमै सार्वजनिक विदाको तालिमका दिएको हो ।

डा. सिके राउत नेतृत्वको जनमत पार्टीले समेत बलिदानी दिवसको अवसरमा सिरहाको लहानस्थित रमेशचौकको रमेश महतोको शालिकमा माल्यार्पण गर्ने कार्यक्रम रहेको बताइएको छ ।