Breaking ! प्रदेश नम्बर २ को नाम 'मधेश प्रदेश' बहुमतले पारित !

न्यूज ब्यूरो, जनकपुरधाम । प्रदेश २ को नामकरणका लागि आज सोमबार भएको मतदान प्रक्रियाको मतगणना अनुसार प्रदेश २ को नाम “मधेश प्रदेश” बहुमतले पारित भएको छ ।

तीन दलको संयुक्त प्रस्ताव मधेस प्रदेशको पक्षमा मतदान सम्पन्नपछि आएको मत परिणाम अनुसार प्रदेश २ को नामाकरण “मधेश प्रदेश” गरिएको हो ।

सत्तारूढ दल जनता समाजवादी पार्टी, माओवादी केन्द्र र प्रमुख प्रतिपक्षी दल लोकतान्त्रिक समाजवादी पार्टीको संयुक्त प्रस्ताव मधेश प्रदेशमा मतदान भएको थियो ।

शैलेन्द्र कुमार यादव र भरत प्रसाद साह प्रस्तावक रहेको नाम मधेस प्रदेश कायम गर्न शैलेन्द्र कुमार यादवले पेश गरेको प्रस्तावमा मतदान भएपछि मतपरिणाम अनुसार “मधेश प्रदेश” बहुमतले पारित भएको हो ।

प्रदेशको नामाकरण मधेश प्रदेशको लागि बहुमतले पारित गर्नको लागि नियम बमोजिम ७० मत आवश्यक रहेकोमा उपस्थित ९९ जना साँसदमध्ये ८० जनाले मधेश प्रदेशलाई छानेपछि बहुमतले प्रदेशको नाम “मधेश प्रदेश” पारित भएको हो ।

मधेश प्रदेशको लागि दुई तिहाई भन्दा अधिक मत पाएपछि आजदेखि प्रदेश नम्बर २ को नाम “मधेश प्रदेश” पारित भएको हो । प्रदेश सभाका सचिव रँजीत कुमार यादवले मत परिणाम सभामुख सरोज कुमार यादव समक्ष पेश गरेका थिए ।

मधेस प्रदेशको प्रस्तावमा पहिलो मत प्रमुख प्रतिपक्षी दल लोसपाकी सांसद डिम्पल झाले हालेकी थिईन् ।

नामकरणका लागि दुई तिहाई मतको आवश्यक थियो । । हाल प्रदेशमा १०४ जना सांसद रहेकोमा ७० मतको आवश्यक थियो । आजको बैठकमा ९९ जना साँसद उपस्थिति जनाएका थिए ।

जसमध्ये प्रदेश २ को नाम मधेश प्रदेश हुनुपर्नेमा ८० जना र हुनुपर्दैन पक्षमा १९ जनाले मत खसालेका थिए । मधेश प्रदेशको लागि कुल मतमध्ये ८० मत खसेपछि बहुमतले प्रदेश २ को नाम मधेश प्रदेश भएको हो ।

मधेस प्रदेशसँगै नामकरणका लागि जानकी, मिथिला भोजपुरा र मध्य मधेश प्रदेश प्रस्ताव दर्ता भएको थियो ।