प्रदेश २ को राजधानी वीरगँज नभए प्रदेशबाट अलग हुन्छौँः साँसद बेगम  (भिडियो सहित)

न्यूज ब्यूरो, जनकपुरधाम । प्रदेश नम्बर २ की साँसद करिमा बेगमले प्रदेश नम्बर २ को स्थायी राजधानी बीरगँज नभए २ नम्बर प्रदेशबाट अलग हुने चेतावनी दिएकी छन् ।

आईतबार प्रदेश सभामा आफ्नो मन्तव्य राख्दै साँसद बेगमले प्रदेश नम्बर २ मा एक मात्र महानगरपालिका वीरगँज भएकोले २ नम्बर प्रदेशको स्थायी राजधानी वीरगँज बनाउनुपर्ने माग गरिन् ।

प्रदेश २ को पर्सा जिल्लाबाट साँसद बनेकी करिमा बेगमले जनकपुरभन्दा वीरगँज सुविधासम्पन्न र सस्तो भएकोले जनकपुरभन्दा वीरगँजलाई स्थायी राजधानी बनाउनुपर्ने तथा नबनाएर प्रदेशबाट अगल हुन तयार रहेको बतानईन् ।

मधेश आन्दोलनको क्रममा नेपाल भारत मैत्री पूलमा ६ महिनासम्म धर्ना दिएर ल्याएको संघीयताको मूलमर्मको लागि वीरगँजलाई स्थायी राजधानी बनाउनुपर्ने अडान राखिन् । उनले वीरगँज सस्तो र खुल्ला भारतसँग खुल्ला बोर्डर भएको कारण पनि राजधानी हुनुपर्ने धारणा राखिन् ।

मधेश आन्दोलन हरेक जिल्लामा भएपनि २२ जिल्लाबाट ८ जिल्लामा समिति भएको मधेशको नामको लागि मधेश प्रदेश हुनुपर्नेमा जोड दिँदै साँसद बेगमले स्थायी राजधानी जसरी पनि वीरगँज नै हुनुपर्ने अडान राखिन् ।

उनले भनिन्–“प्रदेश २ को राजधानी वीरगँजलाई नबनाए परिणाम के हुन्छ त्यो मलाई पनि थाहा छैन । जय मधेश ।”

भिडियो हेर्नुहोस ।

विगत केही दिनदेखि वीरगँजलाई प्रदेशको राजधानी बनाउन आन्दोलन जारी रहेको बेला वीरगँजवासीले राजधानी वीरगँज नभए बागमति (प्रदेश ३) सँग गाभिने चेतावनी दिएको बताइन् ।

उनी वीरगञ्जलाई राजधानी नतोक्ने षड्यन्त्र पनि भइरहेको र सोही कारण आफूलाई विशेष समितिमा नराखेको भन्दै पार्टीविरुद्ध आक्रोस पोखिन् ।

उनले प्रदेश जन्मको ४ बर्षपछि नाम राख्नु आफैँमा लज्जास्पद रहेको बताउँदै मधेशको नामबाट भएको आन्दोलन भएकोले प्रदेशको नाम मधेश प्रदेश नै हुनुपर्ने बताइन् ।

जानकी प्रदेश, मिथिला प्रदेश, भोजपुरा प्रदेश भन्दा पनि मधेश आन्दोलनको नामले पनि प्रदेशको नाम मधेश प्रदेश हुनुपर्ने धारणा राख्दै उनले राजधानी वीरगँज नै हुनुपर्छ बताइन् ।

उनले भनिन्,–“प्रदेश नम्बर २ मा एक मात्र महानगरपालिका छ , छोटै छ तर महानगरपालिका छ वीरगँज । वीरगँज सस्तो छ , छिमेकी मुलुकबाट खुल्ला बोर्डर र आर्थिक रुपले सम्पन्न छ । यहाँका वासिन्दामा नरमी छ गर्मी छैन , जहाँ नरमी छ राजधानी उत्तै हुनुपर्छ ।”

जानकी प्रदेशको सन्दर्भमा बोल्दै उनले जानकी हाम्रो माता भएकोले जानकीजीलाई दिलमा बसाएर राख्नुपर्छ, तर निधारमा नाम लेखेर सुहाउँदैन भनिन् । “जानकी माता हुन, उहाँ हाम्रो अन्तरआत्मामा हुनुहुन्छ । निधारमा उहाँको नाम लेखेर हिडनु भएन् । जनकपुर आफैँमा धार्मिक र पर्यटकीय नगरीको राजधानी हो । तर, प्रदेशको राजधानी वीरगँज नै उत्तम हुन्छ ।”

मैथिली, भोजपुरी हुँदै हिन्दीमा भाषण गरेकी साँसद करिमा बेगमले अन्त्यमा प्रदेशको राजधानी वीरगँज नभए प्रदेशबाट छुट्टीने अघोषित चेतावनी पनि दिइन् ।

पर्सा र आसपास जिल्लाका केहि साँसदले वीरगञ्जलाई प्रदेशको स्थायी राजधानी बनाउनुपर्ने अडान लिएका छन् । आईतबार मात्रै वीरगञ्जस्थित मुख्यमन्त्री लालबाबु राउतको घर अगाडी स्थानीय यूवाहरु प्रदर्शन समेत गरेका थिए ।