किसान v/s जसपा: धनुषा आउन लागेकी मन्त्री यादवलाई किसानहरुले अवरोध गर्ने

न्यूज ब्यूरो, जनकपुरधाम । जनता समाजवादी पार्टीकी नेतृ एवम् संघीय सरकारी भौतिक पूर्वाधार मन्त्री रेणु यादव धनुषा आउन लाग्दा किसानहरुले अवरोध गर्ने तयारी गरेको हो ।

धनुषाको निर्वाचन क्षेत्र नम्बर ३ को मुखियापट्टि मुसरनीयामा आयोजना गरिएको जसपाको पार्टी प्रवेश कार्यक्रममा सहभागी हुन धनुषा आउने भनक पाएपछि किसानहरुले मल,खाद, बीउको माग गर्दै सडक अवरोध गर्ने तयारी गरेको हो ।

यसको लागि किसान आन्दोलनमा होमिएको डा. सिके राउत नेतृत्वको जनमत पार्टीको नेता कार्यकर्ताहरुले धनुषाको विभिन्न ठाउँमा विहानैदेखि टायर बालेर प्रदर्शन सुरु गरेका छन् ।

धनुषाको नगराईन सहित, देवपुरा रुपैठा लगायतको क्षेत्रमा किसानहरुले सडकमा बिहानैदेखि टायर बालेर प्रदर्शन सुरु गरेको छ । करिब ३ सातादेखि निरन्तर आन्दोलनमा रहेको किसानहरुको माग पुरा गर्न विभिन्न चरणको आन्दोलन गरिरहेको छ ।

मन्त्री यादव मधेशबाटै नेतृत्व गरेपनि किसानको समस्याको लागि कुनै पहल नगरेको भन्दै उनको बाटो अवरोधको तयारी गरिएको बताइएको छ । यसका साथै, भूमि व्यवस्था तथा कृषि सहकारी मन्त्री महेन्द्र राय यादव समेत आउने खवर पाएपछि किसानहरुले जान नदिने अडान राखेको छ ।

धनुषाको मुखियापट्टि मुसरनीयामा जनता समाजवादी पार्टी नेपालको वृहत पार्टी प्रवेश कार्यक्रमको आयोजना गरिएको छ ।

धनुषाको क्षेत्र नम्बर ३ स्थित मुखियापट्टी मुसहरनिया वडा नम्बर ६ वेरिया बजारमा हुन गइरहेको बृहत पार्टी प्रवेश कार्यक्रमका लागि आजै बिहान ११ः०० बजे शिव चौक जनकपुरधामबाट मोटरसाइकल रैली सहित नेताहरुलाई लगिने तयारी गरिएको छ ।

जसपाका कार्यकर्ताहरुले मोटरसाईकल रयाली निकालेर पार्टीका अध्यक्ष, मन्त्रीहरु सहित सहभागी हुने अतिथिहरुलाई बेरिया बजारसम्म लिएर जाने कार्यक्रम रहेकोले मोटरसाईकल रयालीमा सहभागी हुन अनुरोध पनि गरिएको छ ।