बालविवाह रोक्नको लागि विभिन्न धर्मका धर्मगुरुहरुसँग लाईफ नेपालको अन्तरक्रिया

न्यूज ब्यूरो, जनकपुरधाम । वर्तमान समाजमा भइरहेको बालबालिकाहको घटनालाई न्यूनिकरण गर्नको लागि विभिन्न धर्मका धर्मगुहरुसँग अन्तरक्रिया गरिएको छ ।

अन्तराष्ट्रिय सँस्था युनिसेफको आर्थिक सहयोग तथा समाजिक सँस्था लाईफ नेपालको समन्वयमा धनुषाको औरही गाउँपालिकामा “बालविवाह विरुद्ध धर्मगुरुहरुसँग छलफल” कार्यक्रम सम्पन्न गरेको छ ।

औरही गाउँपालिकाका अध्यक्ष ब्रहम्देव यादवको अध्यक्षतामा गाउँपालिकामा आयोजना गरिएको सो अन्तरक्रिया कार्यक्रममा बालविवाहको कारण, बालविवाहको नाकारात्मक असर, बालविवाह न्यूनिकरणको प्रयासक विषय उपर वृहत छलफल गरिएको थियो ।

सो क्रममा गाउँपालिका अध्यक्ष यादवले बालविवाह कानुनी अपराध मानिएपनि वर्तमान समाजले यसलाई नजरअन्दाज गर्न पनि बाध्य भएको बताए । दलित, अल्पसँख्यक, सीमान्तकृत समुदायमा बालविवाहको समस्या जटिल रहेको उल्लेख गरे ।

उनले सो कार्यक्रममा बालविवाह न्यूनिकरण गर्नको लागि यहाँका प्रशासनले समेत नजरअन्दाज गर्ने गरेको समस्या औल्याए । उनले यहाँका जनप्रतिनीधिले बालविवाहको बारेमा कानुनी प्रक्रिया खोज्दा गाली गलौज गर्ने, धम्काउने, मान्न नै तयार नहुने जस्ता समस्याहरु औल्याए ।

लाईफ नेपालकी जि.वि.मि. सँयोजक पूजा शर्मा र कार्यक्रम सँयोजक सँगीता ठाकुरले गरेको सहजीकरण एवम् प्रस्तुतिकरणपछि छलफल विधिवत रुपमा सँचालन गरिएको थियो ।

कार्यक्रममा जातीय अगुवा, पँण्डित, मौलाना, महिला अधिकारकर्मी, बालअधिकारकर्मी, शिक्षक, राजनीतिक दलका प्रतिनीधिहरु सम्मलितले बालविवाहको डरलाग्दो अवस्थालाई सहजै स्वीकार गर्न समाज डराएको प्रतिक्रिया दिएको थियो ।

वर्तमान समाजमा रहेको छोराछोरीमाथिको विभेद र आधुनिकतालाई अझै स्वीकार गर्न नसक्दा बालविवाहको जोखिम पनि झन बढदै गएको उल्लेख गरिएको थियो । दाईजो प्रथाको कारण पनि गरिव, निमुखाहरुले २० बर्ष नपुग्दै, प्रतिष्ठामा आँच आउने भन्दै २० बर्ष नपुग्दै विहेबारीको लागि अग्रसर हुने गरेको बताइएको छ ।

सोही कार्यक्रममा सहभागी किशोरी सँजु कुमारी मण्डलले यहाँ आर्थिक अभाव, परिवारजन र समाजको दबाबमा बालविवाह हुने गरेको बताइन् ।

कार्यक्रममा वडा नम्बर ६ का वडाध्यक्षले आफ्नो वडामा अबदेखि छोरी वा छोराको जन्मदर्ता, उमेर हेरेर मात्र बिहेबारी हुन दिने बताए । त्यस वडाका पण्डितहरुले समेत जन्मदर्ता र उमेर हेरेर उमेर पुगेपछि मात्र बिहेबारी गराउने प्रतिबद्धता जाहेर गरेको थियो ।

कार्यक्रममा सोही वडाका युसुफ नदाफले सबभन्दा बढी बालविवाह मुस्लिम समुदायमा हुने गरेको बताउँदै मदरसा शिक्षामा कुनै कानुनी प्रावधानहरु उल्लेख नभएको कारण पनि यस्तो अपराध बढेको बताए ।

कार्यक्रममा लाईफ नेपालको प्रतिनीधि, गाउँपालिकाको स्वास्थ्य शाखा प्रमुख, प्रमुख प्रशासकीय अधिकृत, विभिन्न वडाका वडाध्यक्षहरु, नागरिक समाजहरु, धर्मगुरुको उपस्थिति रहेको थियो ।