नेपाल रेल्वेमा आसेपासे र कार्यकर्तालाई मात्र भर्ना

न्यूज ब्यूरो, जनकपुरधाम । नेपाल रेलवे कम्पनीले जनकपुर–जयनगर रेल सञ्चालन गर्न ६० जना कर्मचारीलाई नियुक्त गरेको छ ।

कम्पनीका महाप्रबन्धक निरन्जन झाले सो मध्ये आधा भारतीय र आधा नेपाली नागरिकलाई कर्मचारीमा नियुक्त गरी तालिम पनि सँचालन गरेको छ ।

कर्मचारी भर्नाको लागि भारतबाट कर्मचारीहरु लिएपनि स्वदेशबाट लिनुपर्ने कर्मचारीको लागि कुनै सूचना, कुनै विज्ञापन नै नगरी आसेपासे र पार्टीका कार्यकर्ताहरुलाई मात्र नियुक्त गरेको आरोप लगाइएको छ ।

तत्कालीन महाप्रबन्धक गुरु भट्टराईले १५० कर्मचारी नियुक्त गरेका थिए । तर भट्टराईलाई हटाएर सरकारले निरञ्जन झालाई महाप्रबन्धक बनाएपछि उनले ति कर्मचारीहरुलाई पदमुक्त गरे । अहिले झाले ६० कर्मचारी नियुक्त गरेर तालिम दिन लागेका छन् ।

नियुक्त गरिएका कर्मचारीमध्ये २६ जना भारतीय प्राविधिक छन् । लो प्यालट, सिग्नल म्यान, स्टेसन मास्टर, टिकट काट्ने र गेट प्वाइन्टको काम गर्न तत्काल ६० कर्मचारी नियुक्त गरिएको बताइएको छ । त्यसमध्ये ३४ जना नेपाली रहेको र उनीहरु पार्टीका कार्यकर्ता मात्र रहेको बताइएको छ ।

कर्मचारी नियुक्तीको लागि कुनै सूचना वा विज्ञापन नै नगरी भित्रैभित्र रेल्वे महाप्रबन्धक झाले आसेपासे र पार्टीका कार्यकर्तालाई नियुक्ती गरेको भन्दै धनुषा जनकनन्दिनी गाउँपालिका वडा नं. १ इनरबाका ईन्द्रजीत गोईतले आपत्ति जनाउँदै आन्दोलनको चेतावनी दिएका छन् ।

उनले कर्मचारी भर्नाको लागि कम्तीमा एउटा सूचना वा विज्ञापन गर्नुपर्ने बताउँदै भित्रैभित्र आफूखुसी आफ्ना नातेदार, आसेपासे र पार्टीका कार्यकर्तालाई नियुक्ती गरेको आरोप लगाए ।

फागुनभित्र रेल सञ्चालनको तयारी गरीएको नेपाल रेलवे कम्पनीले जनाएको छ । जनकपुर–जयनगर रेलमार्ग सञ्चालनका लागि ल्याएको रेल झण्डै १६ महिनापछि हिजो शनिबार विहान परीक्षण गरिएको थियो ।

नेपाल रेल्वेमा गुरु प्रसाद भट्टराई महाप्रबन्धक हुँदा उनले रेल सँचालनको लागि पुरै तयारी गरिसकेका थिए । रेल नियमित सँचालनको लागि केही दिन मात्र बाँकी रहँदा उनलाई पदबाट हटाइएको थियो ।

“रेल्वे महाप्रबन्धकमा गुरु प्रसाद भट्टराई रहेको भए अहिले रेल चलिरहेको हुन्थ्यो”– गोईतले भने । भट्टराईले भिजन सहित रेल सँचालनको तयारी अन्तिम गरेका थिए । रेल सँचालन हुनै लाग्दा उनलाई हटाइएको थियो ।