धनुषाका सिडिओ वास्तोलाको सरुवा, नयाँ सिडिओमा पौडेल आउँदै

न्यूज ब्यूरो, जनकपुरधाम । गृह मन्त्रालयले थप आधा दर्जन जिल्लामा प्रमुख जिल्ला अधिकारी (सिडिओ) परिवर्तन गरेको छ ।

प्राप्त जानकारी अनुसार जिल्ला प्रशासन कार्यालय धनुषाका प्रमुख जिल्ला अधिकारी बन्धु बास्तोला गृह मन्त्रालयमा सरुवा भएका छन् भने धनुषामा लगानी बोर्ड हुँदै शुक्रवार गृह प्रवेश गरेका सुरेन्द्र पौडेललाई पठाइएको छ ।

यसअघि बाराको प्रजिअ हुँदा गृहबाटै बाहिर पठाइएका पौडेल पुनः गृह भित्र्याएर सिडिओमा खटाउनुलाई गृह वृत्तमा अर्थपूर्ण रूपमा हेरिएको छ ।

यसैगरी मन्त्रालयकी सहसचिव हुमकला पाण्डेलाई काभ्रे प्रजिअको जिम्मेवारी दिइएको छ भने काभ्रेका शिवराम पोखरेललाई मन्त्रालय तानिएको छ ।

मन्त्रालयले सल्यानका प्रजिअ लक्ष्मी देवी होमागाई खतिवडालाई मन्त्रालय सरुवा गरेर त्यहाँ सहसचिव विपिन आचार्यलाई खटाईको छ ।

कालिकोटका प्रमुख जिल्ला अधिकारी कृष्णप्रसाद आचार्यलाई मन्त्रालय झिकाउँदै उपसचिव रामहरि शर्मालाई कालिकोटको प्रजिअको जिम्मेवारी दिई पठाइएको छ ।

त्यस्तै सहसचिव सुमन घिमिरेलाई नवलपरासी (पूर्व) को प्रजिअ बनाई पठाइएको छ । त्यहाँकी मनमाया पङ्गेनी भट्टराई केही दिन अघि झिकेर गण्डकी प्रदेश पठाइएको थियो ।

बुधवार मात्रै मन्त्रालयले ९ जिल्लाका प्रजिअको हेरफेर गरेको थियो ।

प्राप्त विवरण अनुसार झापा, सुर्खेत, बागलुङ, बझाङ, बाजुरा, दार्चुला, ओखलढुङ्गा, इलाम, रुकुम पश्चिमलगायतका जिल्लामा प्रमुख जिल्ला अधिकारी पठाएको थियो ।

जसअनुसार जिल्ला प्रशासन कार्यालय झापामा सहसचिव छवि रिजाललाई खटाएको छ भने सुर्खेतको प्रमुख जिल्ला अधिकारीमा खगेन्द्र रिजाललाई सरुवा गरिएको छ । बागलुङको सिडिओमा मन्त्रालयका सहसचिव रमेश ढकाललाई पठाइएको छ ।

यसैगरी बझाङको प्रमुख जिल्ला अधिकारीमा मकवानपुरका सहायक प्रमुख जिल्ला अधिकारी बाबुराम अर्याललाई सरुवा गरिएको छ भने इलाका प्रशासन कार्यालय बुटवलका प्रमुख उपेन्द्र पौडेलको बाजुरा जिल्ला प्रशासन कार्यालयमा गरिएको छ ।

यस्तै बाँकेका सहायक प्रमुख जिल्ला अधिकारी दिर्घराज उपाध्यायलाई दार्चुलाको प्रमुख जिल्ला अधिकारी बनाई पठाइएको छ भने दार्चुलाका सिद्ध राज जोशीलाई गृह मन्त्रालयमा तानिएको छ ।

ओखलढुङ्गाको प्रमुख जिल्ला अधिकारीमा मन्त्रालयका उपसचिव दिल कुमार तामाङ रुकुम पश्चिममा मन्त्रालयकै उपसचिव परमानन्द घिमिरे र इलामको प्रजिअमा माधव ढुङ्गानालाई सरुवा गरिएको प्रशासन सिंहदरवार स्रोतले जानकारी दिएको छ ।