गाउँपालिकाको रजिष्टर, दर्ता चलानी लिएर हाकिम फरार, अधिकृत मिश्रालाई हाजिर गराउन अदालतको आदेश

न्यूज ब्यूरो, जलेश्वर । प्रदेश नम्बर २ मा नयाँ अधिकृत हाजिर हुन जाँदा हाजिरी रजिष्टर, दर्ता, चलानी किताब लिएर भाग्ने जस्ता घटनाहरु बढन थालेको छ ।

संघीय मामिला तथा समान्य प्रशासन मन्त्रालयले नयाँ कर्मचारी खटाउँदा स्थानीय तहमा कार्यरत कर्मचारीहरु तथा जनप्रतिनीधिले दर्ता, चलानी, हाजिरी रजिष्टर नै गायब गर्ने प्रवृति प्रदेश २ मा अधिक देखिएको छ ।

सोही क्रममा महोत्तरी जिल्लाको महोत्तरी गाउँपालिकामा हाजिर हुन गएका प्रमुख प्रशासकीय अधिकृत कन्हैया मिश्रालाई गाउँपालिकाले हाजिर नगराएपछि अदालतले हाजिर गराउन आदेश दिएको छ ।

संघीय मामिला तथा समान्य प्रशासन मन्त्रालयले कन्हैया मिश्रालाई महोत्तरी गाउँपालिकाको प्रमुख प्रशासकीय अधिकृतमा खटाउँदा हाजीर हुन जाँदा हाजिरी रजिष्टर, दर्ता र चलानी किताब गाउँपालिकाका अध्यक्ष एवम् निवर्तमान प्रमुख प्रशासकीय अधिकृत तथा प्रशासन शाखाका कर्मचारी लुकाएका छन् ।

गत मँसिर १७ गतेमा महोत्तरीको महोत्तरी गाउँपालिकामा खटाईएकोमा गाउँपालिका अध्यक्ष, निवर्तमान प्रमुख प्रशासकीय अधिकृत चन्द्रशेखर शर्मा र प्रशासन शाखाका जयमुद्दिन नदाफले हाजिरी रजिष्टर, दर्ता, चलानी किताब लिएर लुकाएको भन्दै अदालते नयाँ प्रमुख प्रशासकीय अधिकृत मिश्रालाई २४ घण्टाभित्र हाजिर गराउन आदेश दिएको हो ।

हाजिर हुन जादाँ हाजिर हुन नदिएपछि मिश्राले उच्च अदालत जनकपुरमा रिट दायर गरेका थिए । सोही रिट उपर सोमबार बसेको एकल ईजलासले मिश्रालाई २४ घण्टाभित्र हाजिर गराउन आदेश दिएको हो ।

मिश्रा कैयौँ पटक गाउँपालिकामा हाजिर हुन गएका थिए । तर, हाजिरी रजिष्टर, दर्ता, चलानी किताबहरु अध्यक्ष सहित कर्मचारीहरुले लुकाएपछि अदालत गएका थिए ।

उनी साबिकको कार्यालयबाट रमाना लिएकोले २४ घण्टाभित्र गाउँपालिकामा हाजिर गराउन आदेश दिएको हो । सोही अनुसार, मिश्रा सोमबार मुचुल्का उठाएर हाजिर भएका हुन् ।

स्थानीय तह सँचालन ऐन ८४ को उफदफा ४ बमोजिम हाजिर हुन आउने कर्मचारीलाई गाउँपालिकाले हाजिर गराउनुपर्ने नियम भएकोले मिश्रालाई २४ घण्टाभित्र हाजिर गराउन आदेश दिएको हो ।

हाजिर भई मिश्राले गर्नुपर्ने काममा कुनै पनि बाधा अवरोध नगर्न नगराउन आदेश समेत अदालतले दिएको हो । मिश्राले गाउँपालिका विरुद्ध उत्प्रेषण मुद्दा दायर गरेको थियो ।