एक्सनमा कान्छो मेयर, "डिजे र रक्सी" आउट

न्यूज ब्यूरो ||
धनुषा : धनुषाको शहिदनगर नगरपालिकामा आजदेखि डिजे बजाउन पूर्ण रुपमा प्रतिबन्ध लगाइएको छ ।

नगर प्रमुख (मेयर) उदय कुमार बरबरियाले नगर भित्र चर्को साउण्डमा डिजे बजाउन पूर्ण रुपमा प्रतिबन्ध गरिएको न्यूज ब्यूरोसँग भने ।

नगरभित्र असलिलता तथा उच्छृँगल गतिविधि सहित जुनसुकै भाषाको गीत चर्को साउण्डमा वा डिजेमा बजाए ५ हजार ५१ रुपैँया जरिवाना सहित कानुनी कारवाही समेत गर्ने निर्णय सर्वसहमतिले पारित गरिएको जनाइएको छ ।

यसका साथै, गाउँ टोलभित्र रहेका रक्सी पसलहरुलाई समेत गाउँ टोल बाहिर राखी सँचालन गर्नुपर्ने तथा व्यवथापन गराउने निर्णय समेत गरिएको छ । व्यवस्थापनको जिम्मेवारी वडा समितिको हुने निर्णय गरिएको छ ।

नगर भित्र रहेको विद्यालय तथा धार्मिक स्थल मठ मन्दिर वा मस्जिद सहित सार्वजनिक कार्यालय नजिक रहेको रक्सी पसल हटाएर अन्य ठाउँमा व्यवस्थापन गराउने निर्णय सर्व सम्मतिले पारित गरिएको जनाइएको छ ।

साथै, नेपाल सरकारले अधिकारीक रुपमा प्रतिबन्ध गरेको औषधीमा समेत पूर्णत प्रतिबन्ध गरिएको जनाइएको छ । प्रतिबन्धित औषधी विक्रीवितरण गरिएको पाईएमा कानुनी कारवाही गर्न कुनै कसर नछाड्ने मेयर बरबरियाले न्यूज ब्यूरोसँग भने ।