Breaking ! सर्लाहीमा घुँरबाट घरमा आगलगी, घरमै जल्यो दुई बालिका

न्यूज ब्यूरो, सर्लाही । प्रदेश नम्बर २ को सर्लाहीमा केही बेर अगाडी भएको आगलगीमा परी दुई बालिका जलेका छन् ।

सर्लाही जिल्लाको कविलासी नगरपालिका वडा नम्बर ७ सिरसिया टोलस्थित बस्ने स्थानीय जोगी महराको घरमा राती करिब ८ः४५ बजेको समयमा आगलगी हुँदा उनको दुई छोरी जलेकी हुन् ।

विपन्न जोगीले वासको लागि बनाएको टहरामा घुँरबाट आगलगी हुँदा जोगी महराकी ३ बर्षिय छोरी सुगान्धी महरा र ५ बर्षिय छोरी लक्ष्मी महरा जलेकी हुन् ।

उनीहरुको शरिरको पुरा भाग जलेको स्थानीय रबिन्द्र कुमार रायले जानकारी दिए । आगलगी हुँदा सोही घरमा सुतिरहेको अवस्थामा एक बालिका भाग्न सफल भएको तथा उनकी आमा समेत भाग्न सफल भएको बताउँदै दुई बालिका भित्रै फँस्दा जलेको बताईएको छ ।

घरबाट बाहिर भागेकी उनकी आमाले रोईकराई मात्र गरिरहिन, तर भित्र छोरी आगोमा फँसेको कुरा भन्दा उनको अधिकाँश भाग जलेको बताईएको छ । गाउँलेहरु आगो निभाउनमा व्यस्त भएको र केही बेरपछि मात्र भित्र बालिका रहेको जानकारीपछि गाउँलेहरुले बालिकालाई निकालेको बताईएको छ ।

रायका अनुसार, आगलगी भएकै बेला गाउँलेलाई भित्र बालिका रहेको जानकारी भएको भए जल्ने थिएनन् । उनको शरिरको लगभग शतप्रतिशत भाग जलेको छ । उनीहरुको उपचारको लागि समुदायिक अस्पताल मलँगवा लगिएको जनाइएको छ ।

रायका अनुसार, उनीहरुको अवस्था हेर्दा बाँच्ने स्थिति कम देखिएको हो । शरिरको पुरै भाग जलेकोले बाँच्ने सँभावना कमै रहेको उनले बताए ।

स्थानीयवासी र समयमै आएको प्रहरीले आगो नियन्त्रणमा लिएको हो । टहराभित्र राखिएको सर समान गरी करिब ४ लाख रुपैयाँ बराबरको धनमालको समेत क्षति भएको छ ।