सिरहामा डोजरले किचेर बालकको मृत्यू, राजमार्ग अवरुद्ध

न्यूज ब्यूरो, सिरहा । प्रदेश नम्बर २ को सिरहा जिल्लास्थित डोजरले किचेर एक बालकको घटनास्थलमै मृत्यू भएको छ ।

सिरहा जिल्लाको धनगढीमाई नगरपालिका वडा नम्बर ९ मुसहर्निया स्थित महेन्द्र राजमार्गको दक्षिणी छेउमा खेलिरहेको बालकलाई डोजरले किचेर मृत्यू भएको हो ।

सो स्थानमा मृतक बालकसहित अन्य दुई जना बालकहरु खेलिरहेका थिए । तीनै जना बालक खेलिरहेको अवस्थामा आएको डोजरले एक बालकलाई किचेको जिल्ला प्रहरी कार्यालय सिरहाले जनाएको छ ।

शनिबार (आज) दिउँसो करिब ४ बजेको समयमा उक्त ठाउँमा सडकमा काम गरिरहेका चाइनिज कम्पनीको डोजरले किच्दा स्थानिय संजीव मोक्तानको ९ वर्षिय छोरा सिद्धार्थ मोक्तानको मृत्यू भएको प्रहरीले जनाएको छ ।

डोजरले किचेर बालकको मृत्यू भएपछि स्थानीयहरुले राजमार्गमा चक्काजाम गरेको थियो । बालक किच्नेलाई कारवाही सहित क्षतिपूर्ति माग गर्दै स्थानीयहरुले चक्काजाम गरेको थियो ।

झण्डै डेढ घण्टा निरन्तर राजमार्ग जाम गरेपछि ईलाका प्रहरी कार्यालय लहानका डिएसपी तपण दाहालको पहलमा चक्काजाम खोलिएको हो । डिएसपी दाहालले घटनाका दोषीलाई कारवाही गर्ने प्रतिवद्धता जनाएपछि स्थानीयहरुले जाम खोलेको थियो ।

अवरुद्ध राजमार्ग करिब ५ः३० बजेको समायमा खुलेको हो । मृतक बालकको शवलाई पोषमर्टमको लागि लहान अस्पताल पठाइएको प्रहरीले जनाएको छ ।

सो घटनाका चालक घटना लगतै फरार रहेको र खोजी कार्य जारी रहेको र घटना बारे थप अनुसन्धान भइ रहेको प्रहरीले जनाएको छ ।