यसपाली विवाहपँचमीमा सीताको मटकोर कमला नदीमा हुने

न्यूज ब्यूरो, जनकपुरधाम । सप्ताहव्यापी रुपमा मनाइने रामजानकी विवाहपँचमी महोत्सवको मटकोर कार्यक्रम यसपाली कमला नदीमा हुने भएको छ ।

मँसिर २१ गते आयोजन हुने रामजानकी मटकोर कार्यक्रमको लागि कमला नगरपालिकाको वडा नम्बर ६ सखुवाको कमला कुम्भ मरान घाटमा गर्ने तयारी गरिएको छ ।

कमला बचाउ अभियानको सहकार्यमा यसपाली विवाहपँचमीको मटकोर कार्यक्रम कमला घाटमा हुने भएको छ । एतिहासिक कमला नदीमै रामजानकीको मटकोर भएको किम्बदन्ती अनुसार कमला कुम्भ घाटमा मटकोर कार्यक्रम आयोजन हुने भएको छ ।

आयोजक महन्थ नवलकिशोर दासको सँयोजकत्वमा मँसिर २१ गते मँगलबार मटकोर विधि कमला नदीमा गरिने जनाइएको छ । जनकपुरको सुन्दर सदन अग्नीकुण्डमा शोभा यात्रा निकाल्दै कमला सरोवरमा गएर मटकोर विधि गरिने बुझिएको छ ।

सो मटकोर कार्यक्रममा सहभागी हुनको लागि सम्पूर्ण कमला नगरपालिकावासी सहित आसपासका नगरपालिकाका वासिन्दाहरुलाई समेत सहभागी हुन अनुरोध गरिएको छ ।