जनकपुरमा आजदेखि माछा–मासु र मदिरा बेच्न नपाउने

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुरधामस्थित शुक्रबारदेखि माछा मासु सहित मदिराजन्य वस्तुहरु विक्री वितरणमा रोक लगाएको छ ।

प्रत्येक बर्ष जनकपुरधाममा धुमधामका साथ मनाइने रामजानकी विवाह महोत्सव अर्थात विवाहपँचमी महोत्सवलाई मध्यनजर गरी आजदेखि ९ दिनसम्म माछामासु सहित मदिरा विक्री वितरणमा रोक लगाइएको छ ।

आज मँसिर १७ देखि आगामी २६ मंसिरसम्म जनकपुरधाममा माछा–मासु र मदिराको बिक्री-वितरण नगर्न जनकपुरधाम उपमहानगरपालिकाले सूचना जारी गरेको छ ।

‘जनकपुरधाममा प्रवेश गर्ने मुख्यद्वार र सीमा एवं जनकपुरधामस्थित परिक्रमा र परिक्रमा क्षेत्रभित्र माछा-मासु र मदिराको बिक्री वितरण, सेवन तथा कारोवार गर्न पूर्णरूपमा निषेध गरिएको छ ।

सप्ताहव्यापी मनाइने रामजानकी विवाह पञ्चमी महोत्सवलाई दृष्टिगत गर्दै जनकपुरधामको सुरक्षा व्यवस्था कडा बनाइएको छ । चाडपर्वकै बेला केही अप्रिय घटना हुन सक्ने भएकाले त्यसलाई मध्यनजर गर्दै सुरक्षा व्यवस्था कडा बनाइएको धनुषाका प्रहरी उपरीक्षक बसन्तकुमार रजौरेले बताए ।

सुरक्षाका लागि बाहिरबाट थप चार सय पचास सुरक्षाकर्मी मगाइएको छ । बाह्रबिघा मैदान, जानकी मन्दिरलगायतका स्थानलाई सिसिटिभीले समेत निगरानी गरिने व्यवस्था मिलाइएको उनले बताए ।