कमला नगरपालिकामा ९ दिनदेखि तालाबन्दी, जनप्रतिनीधिहरुलाई छैन मतलब

न्यूज ब्यूरो, जनकपुरधाम । पूर्वी धनुषाको कमला नगरपालिकाको कार्यालयमा विगत ९ दिनदेखि तालाबन्दी गरिएको छ ।

गत मँसिर ६ गतेदेखि नै कमला नगरपालिका वडा नम्बर १ स्थित रहेको जनता माध्यमिक विद्यालयका विद्यार्थीहरुले नगरपालिकाको मुलगेटमा तालाबन्दी गरिएपनि कसैले चासो देखाएका छैनन् ।

विद्यालयमा शिक्षकको दरबन्दी अनुसार शिक्षक उपलब्ध नभएपनि विद्यार्थीहरुले विगत ९ दिनदेखि तालाबन्दी गरेको छ । तालाबन्दी खुलाउनको लागि न त जनप्रतिनीधि न त कर्मचारीले नै चासो देखाएको छैनन् ।

विद्यालयमा सहज रुपले पठन पाठन हुनुपर्ने, शिक्षक दरबन्दी अनुसार पुग हुनुपर्ने माग सहित विद्यार्थीहरुले मँसिर ६ गते नै तालाबन्दी गरेको हो ।

विद्यालयका निवर्तमान प्रधानाध्यापक जीतेन्द्र कुमार पासवानले राजीनामा गरेपछि कोही अन्य शिक्षकले कमान सम्हाल्न सकेनन् । नगरपालिकाको शिक्षा शाखाले काजमा रहेका सो विद्यालयका दरबन्दीका शिक्षकहरुलाई फिर्ता गराउन पत्राचार गरेपनि शिक्षकहरु अझै फिर्ता आएका छैनन् ।

कमला नगरपालिकाका नगर प्रमुख राम उदगार गोईत नेपाली काँग्रेस पार्टीको अधिवेशनमा व्यवस्ता जनाएपछि समस्याको समाधान अझै हुन सकेको छैनन् । ९ दिनदेखि नै नगरपालिकाको मुल कार्यालय नै बन्द भएपनि सरोकारबाला कसैले चासो देखाएका छैनन् ।

नगर प्रमुख पार्टी अधिवेशनमा व्यस्तता जनाउँदा नगर उप प्रमुख (उपमेयर) ले पनि कुनै चासो देखाएको देखिएनन् । नगर प्रमुख नभएको बेलामा नगर उपप्रमुखको जिम्मेवारी भने रतिभर पनि गरेको देखिएनन्

यता, आगामी मँसिर १६ गते अभिभावक भेला बोलाएर नयाँ प्रधानाध्यापकको टुँगो लगाउँदै समस्या समाधान गरिने बताइएको छ । यद्यपी, विद्यालयमा समस्या हेडमास्टरको नभएर शिक्षकको पदपूर्तिको रहेको छ ।

जिल्ला शिक्षा समन्वय ईकाई धनुषाले मावि मँगराहाको बिषयमा हेडमास्टरको समस्याको बारेमा जानकारी पाएपनि विद्यालय बन्द र नगरपालिकाको कार्यालय नै बन्द रहेको बारेमा कुनै जानकारी नभएको बताए ।

धनुषाका प्रमुख जिल्ला अधिकारी बन्धु प्रसाद वास्तोलाले विगत ९ दिनदेखि नै नगरपालिकाको कार्यालय बन्द रहेको बारेमा आफूलाई नै जानकारी नभएको प्रतिक्रिया दिए । ९ दिनदेखि कुनै प्रशासनीक निकाय बन्द हुनु आफैँमा लज्जास्पद रहेको उनले बताए ।

९ दिनदेखि नगरपालिकाको कार्यालय बन्द रहेपनि कुनै जनप्रनिधिले चासो नलिएको जिज्ञासाप्रति उनले जनप्रतिनीधिको कार्यशैली र कार्य सम्पादनमाथि प्रश्न तेर्साए । उनले यसको बारेमा थप बुझ्ने र एक्सन लिने बताए ।

वडा नम्बर १ का वडाध्यक्ष राजकुमार यादवसँग भने सम्पर्क हुन् सकेनन् । विद्यालय व्यवस्थापन समितिबाट निवर्तमान प्रधानाध्यापक जीतेन्द्र पासवानलाई हटाएपछि विवाद चुलिएको आन्तरिक बुझिएपनि विद्यार्थीहरुले शिक्षकको बहाना लगाएको आरोप छ ।