प्रदेश २ः टिकटक भिडियो बनाउने क्रममा एक स्वास्थ्यकर्मीको मृत्यू

न्यूज ब्यूरो, जनकपुरधाम । टिकटक भिडियो बनाउने क्रममा एक स्वास्थ्यकर्मीको मृत्यू भएको छ । उनी कोशी नदीमा हाम फालेर टिकटक बनाउने क्रममा मृत्यू भएको हो ।

प्रदेश नम्बर २ को सप्तरी जिल्लाको पूर्वी सीमाको रूपमा रहेको हनुमान नगर कंकालिनी नगरपालिका– १ कोशी नदीमा हाम फाल्दा शनिबार दिउँसो झापा दमक घर भएका सुवास नेपालको मृत्यु भएको हो ।

सुवास नेपाल जिल्ला जनस्वास्थ्य कार्यालय मोरङमा अहेव पदमा कार्यरत थिए । टिकटक भिडियो बनाउनको लागि उनी कोशीमा हामफालेको प्रत्यक्षदर्शीहरु बताएका छन् ।

हाम फालेको विषयमा स्थानीयले प्रहरीलाई जानकारी गराएपछि खोज तलास गर्ने क्रममा दिउँसो करिब २ः ३० बजे सुभाष नेपालको शव फेला परेको जिल्ला प्रहरी कार्यालयका प्रहरी प्रवक्ता माधवप्रसाद काफ्लेले जानकारी दिए।

जिल्ला प्रहरी कार्यालय सप्तरीका अनुसार कोसी ब्यारेजको पश्चिमतर्फ पर्ने ५२ नम्बरको ढोकाबाट नदीमा हाम फालेका ४५ वर्षीय सुवास नेपालको मृत्यु भएको हो।

सप्तरी प्रहरीका सूचना अधिकारी डिएसपी माधवप्रसाद काफ्लेका अनुसार शनिबार बिहान करिब पौने १२ बजे नदीमा हाम फालेका नेपालको शव खोजतलासको क्रममा दिउँसो करिब साढे २ बजे भेटिएको हो।

मृतकको शवको पोस्टमार्टम राजविराजस्थित गजेन्द्रनारायण सिंह अस्पतालमा गरिएपछि शव परिवारजनलाई जिम्मा लगाएको बताइएको छ ।