अब रेल्वे सँचालन नभएसम्म आन्दोलन रोकिदैनः युवा नेता साह

न्यूज ब्यूरो, जनकपुरधाम । थन्काइएर राखिएको नेपाल रेल्वे सँचालनको लागि लोकतान्त्रिक समाजवादी पार्टी (लोसपा) का युवा नेता मनोज कुमार साहले पालिकास्तरीय आन्दोलनको बीडा उठाएका छन् ।

नेपाल रेल्वे सँचालनको लागि विभिन्न सँयन्त्रहरु फेल भएपछि युवा नेता साहले यथाशिघ्र सँचालनको लागि सरकारलाई दबाब दिन जनकनन्दिनी गाउँपालिकावासी समक्ष आन्दोलनको लागि अभियान थालेका छन् ।

रेल्वे सँचालनको लागि अभियान चलाएका नेता साहले जनकनन्दिनी गाउँपालिकाको विभिन्न वडामा पुगेर आन्दोलन सुरु गरेका छन् । उनले आम नागरिकबाट दबाब दिनको लागि गाउँपालिकाको विभिन्न वडा वडामा गएर निकायसम्म पुरयाउने लक्ष्य राखेका छन् ।

गतवर्षदेखि नै धनुषाको ईनर्वा हल्टमा थन्काएर राखिएको रेल्वे सँचालनको लागि सरकार परिर्वतन भएपनि असक्षम भएको भन्दै आन्दोलित भएको बताए । उनले रेल सँचालनको लागि विभिन्न गाउँ गाउँबाट जनताहरु उठेको बताए ।

पूर्वी धनुषाको लाईफलाईनको रुपमा रहेको नेपाल रेल्वे बन्द भएको बर्षौ भएपनि नयाँ रेल सँचालन गर्न सकेको छैनन् । जनकनन्दिनी गाउँपालिकाको खजुरी, महुवा, ईनर्बा भएर जाने रेल्वे बन्द हुँदा त्यहाँको व्यापारिक, आर्थिक, समाजिक दृष्टिकोणले समेत ठुलो नोक्सानी भएको बताउँदै नेता साहले अझै सहन नहुने चेतावनी दिए ।

रेल सँचालनको लागि १३६ जना कर्मचारी करारमा भर्ना गर्न खोलेको विज्ञापन वापत करोडभन्दा बढी रकम उठाएर भागेको आरोप लगाउँदै नेपाल रेलवे कम्पनीले सो रकम फिर्ता गर्नुपर्ने माग उठाएका छन् ।

जागिरको लागि गरिब परिवारका युवाहरुले भरेको फाराम वापतको रकम अझै फिर्ता नगरेको भन्दै सो रकम फिर्ता गराउन कडा आन्दोलन जारी राखेको बताए । उनले भने, –“गरिबले पेट काटेर जागिरको लागि फाराम भरेको थियो, त्यो रकम त जसरी पनि फिर्ता गर्नैपर्छ । कि त खोलिएको विज्ञापनमा भर्ना लिनुपर्छ ।”

यसका साथै, नेता साहले जनकनन्दिनी गाउँपालिकाको अवस्था समेत दयनीय भएको भन्दै यहाँको जनप्रतिनीधिहरुप्रति आक्रोस पोखे । उनले जनप्रतिनीधिहरुले कमिशनमा मात्र सीमित हुँदा जनकनन्दिनीको समुचित विकास नभएको आरोप लगाए ।

उनले नेपाल रेल्वे सँचालन गरौँ अभियान थालेर ईन्जिनीयर एवम् अभियन्ता कैलास ठाकुरसँगको समन्वयमा आन्दोलनलाई जारी राख्दै जनकनन्दिनी गाउँपालिकाको विभिन्न वडाबाट स्थानीयहरुलाई जमघट पारेका हुन् ।

नेपाल रेल्वे कम्पनीले कर्मचारी नभएको भन्दै रेल सँचालन गर्न सकेको छैनन् । जानकारी अनुसार, भोली शुक्रबार नेपाल रेल्वेको अन्तिम सिसिआरएस हुने बुझिएको छ ।