जनकपुरः सयौँको सँख्यामा देवपुरा रुपैठा पस्ने तयारीमा हिन्दु युवा समाज

न्यूज ब्यूरो, जनकपुरधाम । जनकपुरधामको देवपुरा रुपैठामा भएको हिन्दु–मुस्लिम विवादपछि सयौँको सँख्यामा देवपुरा रुपैठा पस्ने तयारीमा हिन्दु युवा समाज रहेका छन् ।

सोमबार स्थानीय प्रशासनको रोहबरमा दुवै समुदायबीच ७ बुँदे सहमति भएपनि हिन्दु युवा समाजले देवपुरा रुपैठामा धार्मिक रयाली निकाल्ने तयारी गरेको हो ।

मँगलबार दिउँसो जनकपुरधामको रँगभूमि मैदान (बाह्रविघा) बाट सयौँको सँख्यामा युवाहरुले मोटरसाईकलमा धार्मिक रयाली निकाल्ने तयारी गरेको छ । जबकी, रुपैठामा स्थानीय प्रशासनले निषेधाज्ञा जारी राखेको छ ।

स्थानीय प्रशासनले उनीहरुलाई रोक्नको लागि जनकपुरमै मोटो सँख्यामा प्रहरी खटाएको छ । निषेधाज्ञा अवधीमा कुनै पनि सभा, सेमिनार, धार्मिक यात्रा, रयाली, जुलुस गर्न निषेध गरिएको छ ।

देवपुरा रुपैठाको चारकिल्लाभित्र नारा, जुलस, रयालीहरु गर्न रोक लगाएको छ । छठ पर्वकै दिनदेखि दुई समुदायबीच विवाद बढेपछि स्थानीय प्रशासनले मोटो सँख्यामा सुरक्षाकर्मी खटाएको हो ।

धार्मिक अस्थामाथि प्रहार गरेको भन्दै हिन्दु युवा समाजले वृहत रयाली निकालेर देवपुरा रुपैठामा पस्ने तयारी गरिएको जनाइएको छ । सयौँको सँख्यामा युवाहरुले गेरुवा वस्त्र धारण गरी मोटरसाईकलमा धार्मिक रयाली निकालिने भएको छ ।

यता, निषेधाज्ञा जारी तथा जिल्ला प्रशासन कार्यालय धनुषामा दुवै समुदायको अगुवाको बीचमा भएको ७ बुंदे सहमतिलाई मध्यनजर गर्दै कुनै पनि त्यस्तो कार्यहरु गर्न नदिने प्रशासनको अडानपछि जनकपुरमै रयाली गरिने भएको छ ।

जनकपुरधामभित्रै सोनारपट्टि, जानकी मन्दिर, जनकचोक, भानुचोक, शिवचोक, मिल्सएरिया लगायतको क्षेत्रमा धार्मिक रयाली निकालिने जनाइएको छ । अहिले स्थानीय प्रशासन र हिन्दु युवा समाजबीच छलफल हुँदा देवपुरा रुपैठामा जान नदिने अडान लिएको हो ।

उनीहरुले हिन्दु परम्परामाथि प्रहार बन्द गर नारा सहित वृहत रयालीको तयारी जनकपुरको सँकटमोचन मन्दिर थालेको हो । त्यसको लागि नेपाल भारत सँयुक्त लोकतान्त्रि सँघ पनि समेत सहभागीता रहेको जनाइएको छ ।

यता, धनुषाका प्रहरी प्रमुख (एसपी) बसन्त रजौरेले कुनै पनि हालतमा देवपुरा रुपैठा तर्फ जान नदिने बताएका छन् । सोमबार भएको सहमति बमोजिम र वर्तमान अवस्थालाई मध्यनजर गर्दै त्यहाँ जानबाट रोक लगाएको बताए । उनले जनकपुरको केही स्थानभित्रै रयाली गर्न दिने सहमति भएको बताए ।