मधेश सरकारमा माधव नेपालको पार्टी पनि सहभागी हुँदै, को बन्दैछ नयाँ मन्त्री ?

न्यूज ब्यूरो, जनकपुरधाम । मधेश सरकारमा एक नयाँ मन्त्री बन्ने भएको छ । मधेश सरकारमा माधव नेपाल नेतृत्वको नेकपा एकीकृत समाजवादी पार्टी सामेल हुने भएको छ ।

सो पार्टीका संसदीय दलका नेता शत्रुधन महतो प्रदेश २ सरकारमा सहभागी हुने भएका हुन् । मधेश सरकारमा माधव नेपाल नेतृत्वको पार्टी पनि सामेल हुने भएपछि प्रदेशमा नयाँ तरँग उत्पन्न भएको छ ।

त्यसको लागि मुख्यमन्त्री लालबाबु राउतले नेकपा एकीकृत समाजवादी पार्टीलाई सरकारमा सामेल गर्नका लागि आफ्नै पार्टीबाट उद्योग, पर्यटन तथा वन मन्त्रालयको जिम्मेवारी सम्हालेका रामनरेश रायलाई राजीनामाका लागि निर्देशन दिएका छन् । स्रोतकाअनुसार मन्त्री रायले आजै साँझ वा भोलिसम्ममा राजीनामा दिने तयारी गरेका छन् ।

मुख्यमन्त्री राउतले यसअघि सामाजिक विकासमन्त्री नवलकिशोर सुडीको राजीनामा माग गरेका थिए । विगतमा राजेन्द्र महतोको साथ छाडेर जसपा अध्यक्ष उपेन्द्र यादवलाई साथ दिएका उनले सरकारमै रहने अडान लिएपछि भने उद्योगमन्त्री रायलाई राजीनामा दिन लगाइएको हो ।

उनले राजीनामा दिएपछि नेकपा एकीकृत समाजवादी पार्टीका महतोलाई मन्त्री बनाइने भएको छ । सम्भवतः सोमबार नै मन्त्रिपरिषद्मा हेरफेर हुने बुझिएको भएपनि यथेष्ट जानकारी भने आउन सकेको छैनन् ।

प्रदेश सभा सदस्य समेत रहेका महतो एमालेमा सक्रिय नेता मानिन्छ । प्रदेश २ को धनुषा जिल्लामा नेता महतो प्रभावशाली नेताको रुपमा चिनिन्छ । नेकपा माओवादी केन्द्र र नेकपा एमालेको एकता हुँदा पनि उनी माधव नेपाल गुटमै रहेका थिए ।